ఆసీస్ తో పింక్ బాల్ టెస్టు... టీమిండియా అమ్మాయిలకు ఘోర పరాజయం

పెర్త్ లోని వాకా (డబ్ల్యూఏసీఏ) మైదానం వేదికగా జరిగిన ఏకైక పింక్ బాల్ టెస్టులో భారత మహిళల జట్టు ఘోర పరాజయాన్ని చవిచూసింది. ఆదివారం మూడో రోజు ఆటలో ఆస్ట్రేలియా జట్టు 10 వికెట్ల తేడాతో ఘన విజయం సాధించింది. ఈ విజయంతో దిగ్గజ ప్లేయర్ అలిస్సా హీలీకి ఆస్ట్రేలియా ఘనంగా వీడ్కోలు పలికినట్లయింది. హీలీకి బ్యాటింగ్ చేసే అవకాశం రాకపోయినప్పటికీ, ఆమె విజయంతో తన అంతర్జాతీయ కెరీర్‌ను ముగించింది. తాజా టెస్టు విజయంతో మల్టీ ఫార్మాట్ సిరీస్‌ను ఆస్ట్రేలియా కైవసం చేసుకుంది.

భారత్ ఈ పర్యటనను టి20 సిరీస్ విజయంతో (2-1) ఘనంగా ఆరంభించినప్పటికీ, ఆ తర్వాత ఆసీస్ పుంజుకుంది. వన్డే సిరీస్‌ను క్లీన్ స్వీప్ చేసిన ఆతిథ్య జట్టు, టెస్టులోనూ గెలిచి సిరీస్‌ను సొంతం చేసుకుంది.

కుప్పకూలిన బ్యాటింగ్.. ప్రతీక పోరాటం
మూడో రోజు 105/6 ఓవర్‌నైట్ స్కోరుతో రెండో ఇన్నింగ్స్ ప్రారంభించిన భారత్, ఆస్ట్రేలియా బౌలర్ల ధాటికి ఎక్కువ సేపు నిలవలేకపోయింది. అయితే అరంగేట్రం చేసిన ప్రతీక రావల్, స్నేహ రాణా కాసేపు వికెట్ల పతనాన్ని అడ్డుకున్నారు. ప్రతీక 105 బంతుల్లో తన తొలి అర్ధశతకాన్ని పూర్తి చేసుకుంది. స్నేహ రాణా (30)తో కలిసి ఇన్నింగ్స్‌ను చక్కదిద్దే ప్రయత్నం చేసింది. అయితే గార్డనర్ బౌలింగ్‌లో స్నేహ రాణా ఔట్ కావడం, ఆ వెంటనే కాష్వీ గౌతమ్‌ను అలానా కింగ్ పెవిలియన్ చేర్చడంతో భారత్ కష్టాల్లో పడింది.

చివరికి భారత్ తన రెండో ఇన్నింగ్స్‌లో 149 పరుగులకే ఆలౌట్ అయ్యింది. ప్రతీక రావల్ 63 పరుగులతో ఒంటరి పోరాటం చేసింది. దీంతో ఆస్ట్రేలియా ముందు కేవలం 25 పరుగుల స్వల్ప లక్ష్యం నిలిచింది. ఈ లక్ష్యాన్ని ఆసీస్ ఓపెనర్లు జార్జియా వోల్ (16 నాటౌట్), ఫోబ్ లిచ్‌ఫీల్డ్ (11 నాటౌట్) కేవలం 4.3 ఓవర్లలోనే ఛేదించి విజయాన్ని ఖరారు చేశారు.

అంతకుముందు తొలి ఇన్నింగ్స్‌లో భారత్ 198 పరుగులు చేయగా, ఆస్ట్రేలియా సదర్లాండ్ (129) భారీ సెంచరీతో 323 పరుగులు సాధించి 125 పరుగుల భారీ ఆధిక్యాన్ని సంపాదించింది. ఈ ఆధిక్యమే మ్యాచ్ ఫలితాన్ని శాసించింది. ఆసీస్ బౌలర్లలో లూసీ హామిల్టన్, గార్డనర్ రాణించారు.

సంక్షిప్త స్కోర్లు:
భారత్: 198 & 149 (ప్రతీక రావల్ 63, స్నేహ రాణా 30; లూసీ హామిల్టన్ 3-32)
ఆస్ట్రేలియా: 323 & 28/0 (జార్జియా వోల్ 16*, లిచ్‌ఫీల్డ్ 11*)