ఇంగ్లాండ్‌కు చార్టర్డ్ ఫ్లైట్.. మాకు మాత్రం ఎదురుచూపులే: దక్షిణాఫ్రికా, విండీస్ ఆటగాళ్ల ఆవేదన

టీ20 వరల్డ్ కప్ 2026 ముగింపు దశకు చేరుకున్న వేళ, ప్రయాణ ఏర్పాట్ల విషయంలో అంతర్జాతీయ క్రికెట్ మండలి (ఐసీసీ) తీరుపై దక్షిణాఫ్రికా స్టార్ బ్యాటర్ డేవిడ్ మిల్లర్ తీవ్ర అసహనం వ్యక్తం చేశాడు. ఇంటికి వెళ్లేందుకు విమాన ఏర్పాట్ల విషయంలో ఐసీసీ ఇంగ్లాండ్ జట్టుకు అధిక ప్రాధాన్యత ఇచ్చి, మిగిలిన జట్లను నిర్లక్ష్యం చేస్తోందని మిల్లర్ ఆరోపించాడు. దీనికి వెస్టిండీస్ కోచ్ డారెన్ సామీ కూడా మద్దతు తెలిపాడు.

అమెరికా-ఇజ్రాయెల్, ఇరాన్ మధ్య నెలకొన్న ఉద్రిక్తతల కారణంగా అంతర్జాతీయ విమాన సర్వీసులకు తీవ్ర అంతరాయం ఏర్పడింది. దీంతో టోర్నీ నుంచి నిష్క్రమించిన జట్లను సొంత దేశాలకు పంపేందుకు ఐసీసీ ప్రత్యేక చార్టర్డ్ విమానాలను ఏర్పాటు చేస్తోంది. అయితే, టోర్నీ నుంచి ముందుగా నిష్క్రమించిన జట్లను కాదని, ఆలస్యంగా ఎలిమినేట్ అయిన ఇంగ్లాండ్ జట్టును ముందుగా పంపించడంపై మిల్లర్ మండిపడ్డాడు.

"ఇది నిజంగా హాస్యాస్పదం. వెస్టిండీస్, దక్షిణాఫ్రికా కంటే తర్వాత ఇంగ్లాండ్ ఎలిమినేట్ అయ్యింది. కానీ వారు శనివారం రాత్రే చార్టర్ ఫ్లైట్‌లో ఇంటికి బయల్దేరారు. మేము మాత్రం ఇంకా కోల్‌కతాలోనే ఉండి సమాధానాల కోసం వేచిచూస్తున్నాం" అని మిల్లర్ సోషల్ మీడియా వేదికగా ఆవేదన వ్యక్తం చేశాడు. వాస్తవానికి ఈ మెగా టోర్నీలో వెస్టిండీస్ ప్రస్థానం మార్చి 1నే ముగియగా, దక్షిణాఫ్రికా మార్చి 4న ఇంటిదారి పట్టింది. ఇంగ్లాండ్ మార్చి 5న టోర్నీ నుంచి వైదొలిగింది. అయినా ఇంగ్లాండ్‌కు శనివారమే విమానం కేటాయించగా, మిగిలిన జట్లు ఆదివారం వరకు వేచి చూడాల్సి వచ్చింది.

మిల్లర్ వ్యాఖ్యలపై స్పందించిన వెస్టిండీస్ కోచ్ డారెన్ సామీ.. "వెనుక ఉన్నవారికి వినిపించేలా గట్టిగా చెప్పండి సార్" అంటూ మద్దతు పలికారు. దీనికి మిల్లర్ బదులిస్తూ.. "ఇంగ్లాండ్ కోసం విమానం ఏర్పాటు చేయడానికి ఐసీసీకి ఎక్కువ సమయం పట్టలేదు. కానీ వెస్టిండీస్ 7 రోజులుగా, దక్షిణాఫ్రికా 4 రోజులుగా వేచి చూస్తున్నాయి" అని ఆగ్రహం వ్యక్తం చేశారు. కాగా, ఐసీసీ టీ20 వరల్డ్ కప్ టోర్నీ నేటితో ముగియనుంది. ఈ రోజు (ఆదివారం) ఫైనల్ మ్యాచ్‌లో భారత్, న్యూజిలాండ్ జట్లు తలపడుతున్నాయి.