ఆ ఒక్క తప్పే మ్యాచ్‌ను మలుపు తిప్పింది: ఇంగ్లండ్ కెప్టెన్ హ్యారీ బ్రూక్

టీ20 ప్రపంచకప్ సెమీఫైనల్‌లో భారత్ చేతిలో ఓటమికి ఫీల్డింగ్‌లో చేసిన తప్పిదాలే కీలకమని ఇంగ్లండ్ కెప్టెన్ హ్యారీ బ్రూక్ అంగీకరించాడు. ముఖ్యంగా సంజూ శాంసన్ క్యాచ్ జారవిడచడం తమను తీవ్రంగా దెబ్బతీసిందని మ్యాచ్ అనంతరం అతడు పేర్కొన్నాడు. ఫీల్డింగ్‌లో తమ ప్రణాళికలను సరిగ్గా అమలు చేయలేకపోయామని, పిచ్‌ను అంచనా వేయడంలోనూ విఫలమయ్యామని తెలిపాడు. ఈ ఓటమికి పూర్తి బాధ్యత తానే స్వీకరిస్తున్నట్లు స్పష్టం చేశాడు.

మ్యాచ్ అనంతరం బ్రూక్ మాట్లాడుతూ.. "తొలి ఇన్నింగ్స్‌లో పిచ్ స్పిన్‌కు అనుకూలిస్తుందని, బంతి నెమ్మదిగా వస్తుందని భావించాం. కానీ, బంతి బ్యాట్‌పైకి చక్కగా వచ్చింది. ఈ పరిస్థితులను సద్వినియోగం చేసుకున్న భారత్ అద్భుతంగా బ్యాటింగ్ చేసింది. ముఖ్యంగా శాంసన్ క్యాచ్ వదిలేసి నేను పెద్ద తప్పు చేశాను. ఈ విషయంలో పూర్తి బాధ్యత నాదే. ఫీల్డింగ్‌లో మేం మెరుగ్గా ఆడలేకపోయాం. భారత్ లాంటి బలమైన జట్టుపై ఇలాంటి తప్పిదాలు చేస్తే గెలవడం అసాధ్యం" అని విశ్లేషించాడు. ఇంగ్లండ్ చేసిన ఈ తప్పిదాలను సద్వినియోగం చేసుకున్న సంజూ శాంసన్ కీలక ఇన్నింగ్స్ ఆడి జట్టు భారీ స్కోరు సాధించడంలో ప్రధాన పాత్ర పోషించాడు.

ఓటమిపాలైనా యువ ఆటగాడు జాకబ్ బెథెల్ ప్రదర్శనపై ప్రశంసల వర్షం
ఈ ఓటమి నిరాశపరిచినప్పటికీ, తమ జట్టు యువ ఆటగాడు జాకబ్ బెథెల్ ప్రదర్శనపై బ్రూక్ ప్రశంసలు కురిపించాడు. "బెథెల్ అద్భుతంగా ఆడాడు. భవిష్యత్తులో అతను భారీ మొత్తంలో డబ్బు సంపాదిస్తాడు. తొలి బంతి నుంచే భారత బౌలర్లపై ఎదురుదాడికి దిగి తన సత్తా ఏంటో ప్రపంచానికి చూపించాడు" అని కొనియాడాడు. మొత్తం మీద ఈ టోర్నమెంట్‌లో తమ జట్టు ప్రదర్శన బాగుందని, ఆడిన తీరు పట్ల గర్వంగా ఉంద‌ని బ్రూక్ అన్నాడు. దురదృష్టవశాత్తూ ఫలితం తమకు అనుకూలంగా రాలేదని పేర్కొన్నాడు.