ఫిన్ అలెన్ అరాచకం.. 33 బంతుల్లో ఫాస్టెస్ట్ సెంచరీ.. వరల్డ్ కప్ ఫైనల్లోకి దూసుకెళ్లిన కివీస్

టీ20 ప్రపంచకప్ సెమీ ఫైనల్లో న్యూజిలాండ్ ఓపెనర్ ఫిన్ అలెన్ సృష్టించిన విధ్వంసానికి దక్షిణాఫ్రికా చిత్తయింది. కేవలం 33 బంతుల్లోనే అజేయ శతకం బాదిన అలెన్... వరల్డ్ కప్ చరిత్రలోనే అత్యంత వేగవంతమైన సెంచరీని నమోదు చేశాడు. బుధవారం ఈడెన్ గార్డెన్స్ వేదికగా జరిగిన ఈ మ్యాచ్‌లో 9 వికెట్ల తేడాతో సఫారీలను చిత్తు చేసిన కివీస్, ఘనంగా ఫైనల్లోకి అడుగుపెట్టింది. ఈ టోర్నీలో ఇప్పటివరకు అపజయం ఎరుగని దక్షిణాఫ్రికా, కీలకమైన నాకౌట్ మ్యాచ్‌లో మరోసారి చేతులెత్తేసింది.

దక్షిణాఫ్రికా నిర్దేశించిన 170 పరుగుల లక్ష్యాన్ని న్యూజిలాండ్ కేవలం 12.5 ఓవర్లలో ఒకే వికెట్ కోల్పోయి 173 పరుగులు చేసి ఛేదించింది. న్యూజిలాండ్‌కు ఓపెనర్లు ఫిన్ అలెన్, టిమ్ సీఫర్ట్ (58) అదిరిపోయే ఆరంభాన్నిచ్చారు. ముఖ్యంగా అలెన్ ఆరంభం నుంచే సఫారీ బౌలర్లపై విరుచుకుపడ్డాడు. తన ఇన్నింగ్స్‌లో 10 ఫోర్లు, 8 సిక్సర్లతో పరుగుల సునామీ సృష్టించాడు. వీరిద్దరూ తొలి వికెట్‌కు కేవలం 9.1 ఓవర్లలోనే 117 పరుగుల భాగస్వామ్యం నెలకొల్పి మ్యాచ్‌ను ఏకపక్షం చేశారు. సీఫర్ట్ ఔటయ్యాక వచ్చిన రచిన్ రవీంద్ర (13 నాటౌట్)తో కలిసి అలెన్ మరో వికెట్ పడకుండా 12.5 ఓవర్లలోనే లక్ష్యాన్ని పూర్తి చేశాడు.

అంతకుముందు టాస్ ఓడి బ్యాటింగ్‌కు దిగిన దక్షిణాఫ్రికా నిర్ణీత 20 ఓవర్లలో 8 వికెట్ల నష్టానికి 169 పరుగులు చేసింది. ఒక దశలో 12 పరుగులకే 2 వికెట్లు, 77 పరుగులకే 5 వికెట్లు కోల్పోయి పీకల్లోతు కష్టాల్లో పడింది. అయితే, ఆఖర్లో మార్కో యాన్సెన్ (30 బంతుల్లో 55 నాటౌట్; 2 ఫోర్లు, 5 సిక్సర్లు) అద్భుతమైన హాఫ్ సెంచరీతో జట్టుకు గౌరవప్రదమైన స్కోరు అందించాడు. డివాల్డ్ బ్రెవిస్ (34), ట్రిస్టన్ స్టబ్స్ (29) ఫర్వాలేదనిపించారు. కివీస్ బౌలర్లలో రచిన్ రవీంద్ర, మాట్ హెన్రీ, కోల్ మెక్‌కాంచీ తలా రెండు వికెట్లు పడగొట్టారు.

ఫిన్ అలెన్ రికార్డుల మోత

ఈ మ్యాచ్‌లో ఫిన్ అలెన్ పలు అరుదైన రికార్డులను తన ఖాతాలో వేసుకున్నాడు. టీ20 ప్రపంచకప్ చరిత్రలో ఇదే అత్యంత వేగవంతమైన సెంచరీ (33 బంతుల్లో). గతంలో ఈ రికార్డు క్రిస్ గేల్ (47 బంతులు) పేరిట ఉండేది. టెస్టు హోదా ఉన్న దేశంపై టీ20ల్లో ఇదే ఫాస్టెస్ట్ సెంచరీ. అంతర్జాతీయ టీ20ల్లో ఇది సంయుక్తంగా మూడో అత్యంత వేగవంతమైన శతకం. టెస్టు హోదా ఉన్న జట్ల బ్యాటర్లలో సికందర్ రజా (జింబాబ్వే)తో కలిసి అత్యంత వేగవంతమైన సెంచరీ రికార్డును సమం చేశాడు. మొత్తంమీద ఫిన్ అలెన్ విధ్వంసక బ్యాటింగ్‌తో ఈ సెమీఫైనల్ మ్యాచ్ ఏకపక్షంగా ముగిసింది. దక్షిణాఫ్రికా మరోసారి ఐసీసీ టోర్నీలో నాకౌట్ దశలోనే ఇంటిముఖం పట్టింది.