అల్లు శిరీష్‌ను పెళ్లికొడుకును చేసే కార్యక్రమం... ప్రత్యేక ఆకర్షణగా విజయ్ దేవరకొండ, రష్మిక మందన్న

టాలీవుడ్ యువ హీరో, అల్లు అర్జున్ సోదరుడు అల్లు శిరీష్ త్వరలో ఓ ఇంటివాడు కానున్నాడు. తన ప్రేయసి నయనికా రెడ్డితో మార్చి 6న శిరీష్ ఏడడుగులు వేయనున్నాడు. ఈ క్రమంలో అల్లు వారింట పెళ్లి సందడి ఘనంగా ప్రారంభమైంది. ఆదివారం అల్లు శిరీష్‌ను పెళ్లికొడుకును చేసే వేడుక అత్యంత వైభవంగా జరిగింది. కుటుంబ సభ్యులు, అత్యంత సన్నిహితుల సమక్షంలో జరిగిన ఈ వేడుకకు సంబంధించిన ఫొటోలను శిరీష్ సోషల్ మీడియాలో పంచుకున్నాడు.

ఈ వేడుకలో ఇటీవల వివాహం చేసుకున్న కొత్త జంట విజయ్ దేవరకొండ, రష్మిక మందన్న ప్రత్యేక ఆకర్షణగా నిలిచారు. వీరిద్దరూ నూతన వరుడిని ఆశీర్వదించి సందడి చేశారు. అలాగే అల్లు అర్జున్-స్నేహ రెడ్డి, గ్లోబల్ స్టార్ రామ్ చరణ్-ఉపాసన దంపతులు, నందమూరి బాలకృష్ణ అర్ధాంగి వసుంధర కూడా హాజరై కాబోయే వరుడికి శుభాకాంక్షలు తెలిపారు. అంతకుముందే శిరీష్ నివాసంలో పసుపు దంచే కార్యక్రమంతో పెళ్లి పనులు సాంప్రదాయబద్ధంగా మొదలయ్యాయి.

మార్చి 6న కేవలం కుటుంబ సభ్యులు, మిత్రుల సమక్షంలో ఈ వివాహం జరగనుంది. అయితే, సినీ పరిశ్రమ ప్రముఖుల కోసం మార్చి 2న (రేపు) అల్లు స్టూడియోస్‌లో భారీ ప్రీ-వెడ్డింగ్ పార్టీని ఏర్పాటు చేసినట్లు శిరీష్ స్వయంగా వెల్లడించారు. "నయనిక నేను మార్చి 6న పెళ్లి చేసుకుంటున్నాం. కానీ మార్చి 2న ఇండస్ట్రీ మిత్రుల కోసం గ్రాండ్‌గా ప్రీ-వెడ్డింగ్ రిసెప్షన్ జరుపుకుంటున్నాం" అని ఆయన పేర్కొన్నారు. మరోవైపు, ఫిబ్రవరి 26న ఉదయపూర్‌లో ఒక్కటైన రష్మిక-విజయ్ జంట మార్చి 4న హైదరాబాద్‌లో తమ వెడ్డింగ్ రిసెప్షన్ నిర్వహించనున్నారు.