అమరావతి సమీపంలో ఏపీ జ్యుడీషియల్ అకాడమీ... సీజేఐ చేతులమీదుగా శంకుస్థాపన

ఆంధ్రప్రదేశ్ న్యాయ వ్యవస్థ చరిత్రలో మరో కీలక ఘట్టం ఆవిష్కృతమైంది. సుప్రీంకోర్టు ప్రధాన న్యాయమూర్తి (సీజేఐ) జస్టిస్ సూర్యకాంత్ చేతుల మీదుగా ఆదివారం అమరావతి సమీపంలోని పిచ్చుకలపాలెం వద్ద ఏపీ జ్యుడీషియల్ అకాడమీ నిర్మాణానికి ఘనంగా శంకుస్థాపన జరిగింది. రాష్ట్రంలో న్యాయమూర్తులకు అత్యున్నత ప్రమాణాలతో కూడిన శిక్షణ అందించే లక్ష్యంతో, సుమారు రూ.165 కోట్ల భారీ వ్యయంతో ఈ అకాడమీని నిర్మిస్తున్నారు.

మొత్తం 4.83 ఎకరాల విస్తీర్ణంలో, 2.05 లక్షల చదరపు అడుగుల నిర్మాణ వైశాల్యంతో ఈ ప్రాజెక్టును చేపడుతున్నారు. అమరావతిలోని ఏపీ హైకోర్టుకు కేవలం 5.7 కిలోమీటర్ల దూరంలో, 50 మీటర్ల వెడల్పు కలిగిన రహదారి పక్కన ఈ అకాడమీని ఏర్పాటు చేస్తుండటంతో దీనికి అద్భుతమైన కనెక్టివిటీ ఉండనుంది. భవిష్యత్తు అవసరాలను దృష్టిలో ఉంచుకుని, ఒకేసారి 120 మంది ట్రైనీ జడ్జిలకు శిక్షణ ఇచ్చే సామర్థ్యంతో దీనిని తీర్చిదిద్దుతున్నారు.

ఈ అకాడమీలో నిర్మించనున్న వివిధ బ్లాక్‌లు, వాటిలో కల్పించనున్న సౌకర్యాల వివరాలు ఇలా ఉన్నాయి:

* బ్లాక్ A (అడ్మినిస్ట్రేటివ్ & అకాడమిక్): ఇది జి+3 అంతస్తులతో ఉంటుంది. ఇందులో 500 మంది కూర్చునే సామర్థ్యం గల ఆడిటోరియం, 120 సీట్ల సెమినార్ హాల్, 70 సీట్ల సామర్థ్యంతో రెండు క్లాస్‌రూమ్‌లు, మూట్ కోర్ట్ హాల్, 60 సీట్ల ఫోరెన్సిక్ ల్యాబ్, 50 సీట్ల కంప్యూటర్ ల్యాబ్, 48 సీట్ల లైబ్రరీ, రీడింగ్ రూమ్, డైరెక్టర్ కార్యాలయాలు, జడ్జెస్ లాంజ్, ఫ్యాకల్టీ రూమ్‌లు, హెల్త్ యూనిట్ వంటి సౌకర్యాలు ఉంటాయి.

* బ్లాక్ B (రెసిడెన్షియల్ & ఎమెనిటీస్): ఇది కూడా జి+3 అంతస్తులతో ఉంటుంది. ఇందులో 108 సీట్ల సాధారణ డైనింగ్ హాల్, 10 సీట్ల విఐపీ డైనింగ్, పూర్తి స్థాయి వంటగది, జిమ్, బ్యాడ్మింటన్, స్క్వాష్ కోర్టులు, టేబుల్ టెన్నిస్ హాల్, యోగా మరియు మెడిటేషన్ కోసం మల్టీపర్పస్ హాల్‌ను ఏర్పాటు చేయనున్నారు.

* బ్లాక్ B2 (హాస్టల్ సౌకర్యం): ఇది జి+8 అంతస్తుల ఎత్తైన భవనం. జ్యుడీషియల్ అధికారులు, ట్రైనీల వసతి కోసం దీనిని కేటాయించారు. ఒక్కో అంతస్తులో 98 సీట్ల యూనిట్, సూట్ రూమ్‌లు, లాంజ్‌లు, ప్యాంట్రీలు ఉంటాయి.

* బ్లాక్ B3 (సిబ్బంది వసతి & ఇతరాలు): ఇది జి+1 భవనం. ఇందులో స్విమ్మింగ్ పూల్, సిబ్బంది క్వార్టర్స్, పార్కింగ్ సదుపాయం ఉంటుంది. అదనంగా బేస్‌మెంట్ పార్కింగ్, టూ-వీలర్ పార్కింగ్, సైక్లింగ్, వాకింగ్ ట్రాక్‌లు, డ్రైవర్ల కోసం డార్మిటరీ కూడా ఉంటాయి.

ఈ శంకుస్థాపన కార్యక్రమంలో రాష్ట్ర ముఖ్యమంత్రి చంద్రబాబు, సుప్రీంకోర్టు న్యాయమూర్తులు జస్టిస్ జె.కె. మహేశ్వరి, జస్టిస్ పి.ఎస్. నరసింహ, జస్టిస్ ప్రశాంత్ కుమార్ మిశ్రా, జస్టిస్ ఎస్.వి.ఎన్. భట్టి, జస్టిస్ జోయా మల్యా బాగ్చీ, ఏపీ హైకోర్టు ప్రధాన న్యాయమూర్తి జస్టిస్ ధీరజ్ సింగ్ ఠాకూర్, ప్రభుత్వ ప్రధాన కార్యదర్శి శ్యామల రావు, గుంటూరు కలెక్టర్ తదితర ప్రముఖులు పాల్గొన్నారు. 

ఈ సందర్భంగా జ్యుడీషియల్ అకాడమీ మరియు అమరావతి అభివృద్ధి పనులపై ప్రత్యేక ఆడియో-వీడియో డాక్యుమెంటరీని ప్రదర్శించారు. ఈ అకాడమీ పూర్తయితే రాష్ట్రంలో న్యాయ శిక్షణ వ్యవస్థ మరింత బలోపేతం అవుతుందని అధికారులు తెలిపారు.