ఏఐ కంపెనీ ఆంథ్రోపిక్‌పై ట్రంప్ సర్కార్ కొరడా.. టెక్నాలజీ వాడకంపై నిషేధం

అగ్రరాజ్యం అమెరికాలో ఆర్టిఫిషియల్ ఇంటెలిజెన్స్ (AI) వినియోగంపై పెద్ద వివాదం రాజుకుంది. ప్రముఖ ఏఐ సంస్థ ఆంథ్రోపిక్‌తో పెంటగాన్ (అమెరికా రక్షణ శాఖ)కు మధ్య తలెత్తిన విభేదాల నేపథ్యంలో అధ్యక్షుడు డొనాల్డ్ ట్రంప్ సంచలన నిర్ణయం తీసుకున్నారు. ఫెడరల్ ఏజెన్సీలన్నీ తక్షణమే ఆంథ్రోపిక్ టెక్నాలజీ వాడకాన్ని నిలిపివేయాలని శుక్రవారం ఆదేశాలు జారీ చేశారు.

ఈ మేరకు తన సోషల్ మీడియా ప్లాట్‌ఫామ్ 'ట్రూత్ సోషల్'లో ట్రంప్ ఒక పోస్ట్ చేశారు. "ఆంథ్రోపిక్ టెక్నాలజీ మాకు అవసరం లేదు, దాన్ని మేము కోరుకోవడం లేదు. ఇకపై ఆ సంస్థతో ఎలాంటి వ్యాపారం చేయబోం" అని ఆయన స్పష్టం చేశారు. ఇప్పటికే ఆ సంస్థ టెక్నాలజీని వినియోగిస్తున్న రక్షణ శాఖ వంటి ఏజెన్సీలకు, దాన్ని దశలవారీగా తొలగించేందుకు ఆరు నెలల గడువు ఇచ్చారు.

యుద్ధంలో తమ 'క్లాడ్' అనే ఏఐ మోడల్‌ను పరిమితులు లేకుండా వాడేందుకు పెంటగాన్ ఒత్తిడి చేయగా, ఆంథ్రోపిక్ అందుకు నిరాకరించింది. మనుషుల ప్రమేయం లేని ఆయుధాలు, ప్రజలపై నిఘా వంటి వాటికి తమ టెక్నాలజీని వాడటం నైతికంగా, సాంకేతికంగా సరికాదని ఆంథ్రోపిక్ సీఈవో డారియో అమోడీ స్పష్టం చేశారు. దీనిపై ఆగ్రహం వ్యక్తం చేసిన ట్రంప్ సైన్యం ఎలా పోరాడాలో ఒక కంపెనీ నిర్దేశించడాన్ని సహించబోమని అన్నారు.

మరోవైపు, అమెరికా రక్షణ మంత్రి పీట్ హెగ్సెత్, ఆంథ్రోపిక్‌ను "జాతీయ భద్రతకు సరఫరా ముప్పు (సప్లై-చెయిన్ రిస్క్)"గా అధికారికంగా ప్రకటించారు. ఇది సంస్థ అహంకారానికి, ద్రోహానికి నిదర్శనమని విమర్శించారు. ఈ పరిణామంతో ఆంథ్రోపిక్ ప్రత్యర్థులైన ఎలాన్ మస్క్‌కు చెందిన గ్రోక్, గూగుల్, ఓపెన్ఏఐ వంటి సంస్థలకు లబ్ధి చేకూరే అవకాశం ఉందని విశ్లేషకులు భావిస్తున్నారు.