టీ20 ప్రపంచకప్ నుంచి శ్రీలంక ఔట్.. ఓటమి సిగ్గుచేటన్న కెప్టెన్

టీ20 ప్రపంచకప్ సెమీస్ రేసు నుంచి సహ-ఆతిథ్య జట్టు శ్రీలంక నిష్క్రమించింది. కొలంబోలోని ప్రేమదాస స్టేడియంలో న్యూజిలాండ్‌తో జరిగిన కీలక మ్యాచ్‌లో 61 పరుగుల భారీ తేడాతో ఓటమిపాలైంది. సొంత గడ్డపై, అభిమానుల మధ్య ఈ ఓటమి తమను తీవ్రంగా నిరాశపరిచిందని, ఇది చాలా సిగ్గుగా ఉందని కెప్టెన్ దసున్ షనక ఆవేదన వ్యక్తం చేశాడు.

ఈ మ్యాచ్‌లో మొదట బ్యాటింగ్ చేసిన న్యూజిలాండ్ 20 ఓవర్లలో 7 వికెట్లకు 168 పరుగులు చేసింది. ముఖ్యంగా చివరి నాలుగు ఓవర్లలో ఏకంగా 70 పరుగులు సమర్పించుకుని లంక బౌలర్లు పట్టు విడిచారు. అనంతరం 169 పరుగుల లక్ష్యంతో బరిలోకి దిగిన శ్రీలంక ఏ దశలోనూ విజయం వైపు సాగలేదు. కివీస్ స్పిన్నర్ రచిన్ రవీంద్ర (4/27) దెబ్బకు లంక బ్యాటింగ్ ఆర్డర్ కుప్పకూలింది. నిర్ణీత 20 ఓవర్లలో 8 వికెట్లకు 107 పరుగులు మాత్రమే చేసి టోర్నీ నుంచి నిష్క్రమించింది.

మ్యాచ్ అనంతరం షనక మాట్లాడుతూ.. "సొంత ప్రేక్షకుల మద్దతు ఉన్నా వారిని నిరాశపరచడం బాధగా ఉంది. మేము బౌలింగ్‌లో మంచి ఆరంభం పొందినా, శాంట్నర్-మెక్‌కోంచీ భాగస్వామ్యం మ్యాచ్‌ను మా నుంచి దూరం చేసింది. మా అగ్రశ్రేణి బ్యాటర్లు బాధ్యత తీసుకోవడంలో విఫలమయ్యారు. టీ20 క్రికెట్‌లో దూకుడుగా ఆడాలి. ఆ ప్రయత్నంలో ఔటైనా ఫర్వాలేదు, కానీ మా వాళ్లు ఆ సాహసం చేయలేదు" అని విశ్లేషించాడు.

పిచ్ కొత్తది కావడంతో ఇంతగా టర్న్ అవుతుందని ఊహించలేదని, అయితే న్యూజిలాండ్ బౌలర్లు సరైన ప్రదేశాల్లో బంతులు వేసి తమను కట్టడి చేశారని షనక అంగీకరించాడు. టోర్నీలో ఇంకా ఒక మ్యాచ్ మిగిలి ఉందని, కనీసం ఆ మ్యాచ్‌లోనైనా గెలిచి గౌరవంగా ముగించాలని భావిస్తున్నట్లు తెలిపాడు.