అతిగా ఆలోచించవద్దు.. టీమిండియాకు పాంటింగ్ సూచన

టీ20 ప్రపంచకప్‌ సూపర్-8లో దక్షిణాఫ్రికాతో జరిగిన మ్యాచ్‌లో టీమిండియా 76 పరుగుల తేడాతో ఘోర పరాజయం పాలైన నేపథ్యంలో ఆస్ట్రేలియా మాజీ కెప్టెన్ రికీ పాంటింగ్ భారత జట్టు యాజమాన్యానికి కీలక సూచనలు చేశాడు. ప్రత్యర్థి జట్టులోని బ్యాటర్లను బట్టి (మ్యాచ్-అప్స్) తుది జట్టును ఎంపిక చేసే వ్యూహాన్ని పక్కనపెట్టి, అత్యుత్తమ పదకొండు మందితో బరిలోకి దిగాలని ఆయన హితవు పలికాడు.

నరేంద్ర మోదీ స్టేడియంలో జరిగిన ఈ మ్యాచ్‌లో దక్షిణాఫ్రికా బ్యాటింగ్ లైనప్‌లో ఎడమచేతి వాటం బ్యాటర్లు ఎక్కువగా ఉన్నారనే కారణంతో వైస్ కెప్టెన్ అక్షర్ పటేల్ స్థానంలో వాషింగ్టన్ సుందర్‌ను జట్టులోకి తీసుకున్నారు. అయితే, ఈ వ్యూహం పూర్తిగా విఫలమైంది. తొలుత దక్షిణాఫ్రికా 187 పరుగులు చేయగా, ఛేదనలో భారత జట్టు 111 పరుగులకే కుప్పకూలింది. ఈ ఓటమితో టోర్నమెంట్‌లో భారత్ తొలి పరాజయాన్ని చవిచూసింది.

ఈ నేపథ్యంలో 'ది ఐసీసీ రివ్యూ' కార్యక్రమంలో పాంటింగ్ మాట్లాడుతూ... "ప్రత్యర్థి జట్టులో లెఫ్ట్ హ్యాండర్లు ఉన్నారనే కారణంతో అక్షర్‌ను ఆడించలేదని కామెంటరీలో చెప్పారు. కానీ, జట్టులో రైట్ హ్యాండర్లు కూడా ఉన్నారు కదా. సరైన సమయంలో అక్షర్‌ను ఎలా ఉపయోగించుకోవాలనేది కెప్టెన్ నైపుణ్యంపై ఆధారపడి ఉంటుంది" అని వ్యాఖ్యానించాడు. కేవలం మ్యాచ్-అప్‌ల కోసం కీలక ఆటగాడిని పక్కనపెట్టడం సరైన నిర్ణయం కాదని ఆయన అభిప్రాయపడ్డాడు.

ఈ ఓటమి భారత నెట్ రన్ రేట్‌పై తీవ్ర ప్రభావం చూపింది. సెమీస్ ఆశలు సజీవంగా ఉండాలంటే మిగిలిన మ్యాచ్‌లలో తప్పక గెలవాల్సిన పరిస్థితి ఏర్పడింది. తదుపరి చెన్నైలో జరగనున్న మ్యాచ్‌లో భారత జట్టు ప్రాథమిక అంశాలపై దృష్టి సారించాలని పాంటింగ్ సూచించాడు. "నేనైతే పరిస్థితులకు తగిన అత్యుత్తమ జట్టు ఏది అని మాత్రమే ఆలోచిస్తాను. అందులో అక్షర్ పటేల్ ఉన్నా ఫర్వాలేదు. లేదా కుల్దీప్ యాదవ్‌ను తిరిగి తీసుకురావడం గురించి కూడా ఆలోచిస్తాను. ఎందుకంటే రిస్ట్ స్పిన్నర్ అయిన కుల్దీప్‌కు లెఫ్ట్, రైట్ హ్యాండర్లతో సంబంధం లేదు. అతను ఇద్దరినీ ఇబ్బంది పెట్టగలడు" అని పాంటింగ్ విశ్లేషించాడు.