అక్రమ IPTV వాడితే కఠిన చర్యలు.. అమెరికాలోని ఎన్నారైలకు ఓటీటీల షాక్!

అమెరికాలో నివసిస్తున్న ప్రవాస భారతీయులకు (ఎన్నారైలు) ప్రముఖ ఓటీటీ ప్లాట్‌ఫామ్‌లు గట్టి షాక్ ఇచ్చాయి. అక్రమంగా ఇంటర్నెట్ ప్రోటోకాల్ టెలివిజన్ (IPTV) సేవలను వినియోగిస్తున్న యూజర్లకు నేరుగా లీగల్ నోటీసులు పంపడం ప్రారంభించాయి. వేలాది మంది ఎన్నారైలు ఇప్పటికే తమ వాట్సాప్, ఈ-మెయిల్, ఎస్ఎంఎస్‌ల ద్వారా ఈ హెచ్చరికలు అందుకున్నట్టు తెలుస్తోంది. డిజిటల్ పైరసీని అరికట్టేందుకు ఓటీటీ సంస్థలు ఈ కఠిన చర్యలకు ఉపక్రమించాయి.

ఈ నోటీసుల ద్వారా యూజర్లను తీవ్రంగా హెచ్చరిస్తున్నారు. అక్రమ స్ట్రీమింగ్ సేవలను వెంటనే నిలిపివేయాలని, పైరసీకి సంబంధించిన యాప్‌లను ఫోన్ల నుంచి తొలగించాలని, చట్టవిరుద్ధమైన సెట్-టాప్ బాక్సులను ధ్వంసం చేయాలని స్పష్టం చేస్తున్నారు. ఈ హెచ్చరికలను బేఖాతరు చేస్తే తీవ్రమైన చట్టపరమైన పరిణామాలు ఎదుర్కోవాల్సి వస్తుందని ఆ నోటీసుల్లో పేర్కొన్నారు. అమెరికాలో డిజిటల్ పైరసీ ఉల్లంఘనలు ఇమ్మిగ్రేషన్ అండ్ కస్టమ్స్ ఎన్‌ఫోర్స్‌మెంట్ (ICE) పరిధిలోకి వస్తాయని, పౌరసత్వం లేని వారు పట్టుబడితే భారీ జరిమానాలతో పాటు దేశం నుంచి బహిష్కరించే (deportation) ప్రమాదం కూడా ఉందని నివేదికలు హెచ్చరిస్తున్నాయి.

ఇదిలా ఉండగా, భారత ప్రభుత్వం కూడా ఓటీటీ ప్లాట్‌ఫామ్‌లపై కఠిన చర్యలు తీసుకుంది. అశ్లీల కంటెంట్‌ను ప్రసారం చేస్తున్నాయన్న కారణంతో ఐదు ఓటీటీ యాప్‌లపై నిషేధం విధించింది. సమాచార ప్రసార మంత్రిత్వ శాఖ ఆదేశాల మేరకు MoodXVIP, Koyal Playpro, Digi Movieplex, Feel, Jugnu అనే ప్లాట్‌ఫామ్‌లను బ్లాక్ చేశారు. ఇన్ఫర్మేషన్ టెక్నాలజీ చట్టం, 2000 కింద ఈ చర్యలు తీసుకున్నట్టు కేంద్ర ప్రభుత్వం వెల్లడించింది.