ముఖ్యమంత్రిని ఇంటర్వ్యూ చేసిన మోహన్ లాల్... ప్రోమో ఇదిగో!

సాధారణంగా సినీ ప్రముఖులను జర్నలిస్టులు, రాజకీయ నేతలు ఇంటర్వ్యూ చేస్తుంటారు. కానీ, కేరళలో దీనికి భిన్నమైన దృశ్యం ఆవిష్కృతమైంది. మలయాళ సూపర్ స్టార్, దాదాసాహెబ్ ఫాల్కే అవార్డు గ్రహీత మోహన్‌లాల్... ఏకంగా కేరళ ముఖ్యమంత్రి పినరయి విజయన్‌ను ఇంటర్వ్యూ చేశారు. ఇప్పటివరకు అనేక ఇంటర్వ్యూలలో ప్రశ్నలను ఎదుర్కొన్న మోహన్‌లాల్, ఈసారి ప్రశ్నలు అడిగే పాత్రను పోషించడం ఆసక్తి కలిగిస్తోంది.

సీఎం అధికారిక నివాసమైన క్లిఫ్ హౌజ్‌లో ఈ ప్రత్యేక ముఖాముఖి జరిగింది. ఈ ప్రాజెక్ట్ కోసం మోహన్‌లాల్ రెండు రోజులు తిరువనంతపురంలో గడిపినట్లు సమాచారం. ఒక రోజు చర్చలు జరిపి, మరుసటి రోజు ఇంటర్వ్యూను చిత్రీకరించారు. ఇందులో ముఖ్యమంత్రి వ్యక్తిగత జీవితం, రాజకీయ ప్రస్థానం, ప్రభుత్వ పాలన వంటి అంశాలపై మోహన్‌లాల్ ప్రశ్నలు సంధించినట్లు తెలుస్తోంది. ఈ ఇంటర్వ్యూ టీజర్‌ను మంగళవారం సాయంత్రం విడుదల చేశారు. పూర్తి ఇంటర్వ్యూ త్వరలో ప్రముఖ ఛానెళ్లలో ప్రసారం కానుంది.

ఎన్నికలు సమీపిస్తున్న తరుణంలో ఈ ఇంటర్వ్యూ జరగడం రాజకీయంగా ప్రాధాన్యత సంతరించుకుంది. ఇది ప్రభుత్వ పబ్లిక్ రిలేషన్స్ (పీఆర్) ప్రయత్నాల్లో భాగమేనని విపక్షాలు ఇప్పటికే ఆరోపణలు గుప్పిస్తున్నాయి. అయితే, మోహన్‌లాల్ ఒక ముఖ్యమంత్రిని ఇంటర్వ్యూ చేయడం ఇదే తొలిసారి కాదు. గతంలో మాజీ సీఎం ఊమెన్ చాందీని కూడా ఆయన ఇలాగే ఇంటర్వ్యూ చేశారు.

ఇప్పటికే క్లిఫ్ హౌజ్‌లో మోహన్‌లాల్, పినరయి విజయన్ కలిసి ఉన్న ఫోటోలు సోషల్ మీడియాలో వైరల్ అయ్యాయి. ఈ ముఖాముఖి రాజకీయాలను ప్రభావితం చేస్తుందో లేదో కానీ, ఒక సూపర్ స్టార్ ప్రశ్నలు అడుగుతుంటే కేరళ మొత్తం ఆసక్తిగా చూస్తుందనడంలో సందేహం లేదు.