స్టేజ్‌పై రకుల్‌ను పట్టించుకోని ఇన్‌ఫ్లుయెన్సర్.. అసలేం జరిగిందంటే..!

స్టార్ హీరోయిన్ రకుల్ ప్రీత్ సింగ్ మరోసారి వార్తల్లో నిలిచారు. అయితే, ఈసారి సినిమా వల్ల కాదు, ఓ అవార్డు వేడుకలో జరిగిన చిన్న సంఘటన కారణంగా ఆమె సోషల్ మీడియాలో హాట్ టాపిక్‌గా మారారు. ఇటీవల జరిగిన ఒక ప్రైవేట్ అవార్డుల కార్యక్రమంలో రకుల్ చేతుల మీదుగా అవార్డు అందుకున్న ఓ ఫిట్‌నెస్ ఇన్‌ఫ్లుయెన్సర్ ప్రవర్తన నెటిజన్ల మధ్య తీవ్ర చర్చకు దారితీసింది. ఈ ఘటనకు సంబంధించిన వీడియో ప్రస్తుతం నెట్టింట‌ వైరల్ అవుతోంది.

వివరాల్లోకి వెళితే.. ఈ అవార్డుల కార్యక్రమంలో రకుల్ ప్రీత్ సింగ్ విజేతలకు అవార్డులు ప్రదానం చేశారు. ఈ క్రమంలో ఫిట్‌నెస్ ఇన్‌ఫ్లుయెన్సర్ జగ్గీ తన అవార్డును స్వీకరించడానికి వేదికపైకి వచ్చారు. అయితే, అతను రకుల్ చేతి నుంచి అవార్డు తీసుకునేటప్పుడు ఆమె వైపు చూడకపోవడం, కనీసం షేక్‌హ్యాండ్ కూడా ఇవ్వకుండానే అక్కడి నుంచి వెళ్లిపోవడం వీడియోలో స్పష్టంగా కనిపించింది. ఆ సమయంలో రకుల్ కొంత ఆశ్చర్యంగా, అయోమయంగా అతని వైపు చూశారు. ఈ దృశ్యం సోషల్ మీడియాలో వైరల్ కావడంతో జగ్గీ ప్రవర్తన రకుల్‌ను అగౌరవపరిచేలా ఉందని పలువురు విమర్శించారు.

ఈ వీడియోపై విమర్శలు వెల్లువెత్తడంతో ఇన్‌ఫ్లుయెన్సర్ జగ్గీ స్పందించారు. తన ప్రవర్తన వెనుక దురుద్దేశం లేదని స్పష్టం చేశారు. తనకు ముందు అవార్డు తీసుకున్న ఓ మహిళకు రకుల్ షేక్‌హ్యాండ్ ఇవ్వలేదని, అది గమనించే తాను కూడా కేవలం అవార్డు తీసుకుని సైలెంట్‌గా వెళ్లిపోయానని వివరణ ఇచ్చారు. ఇది వ్యక్తిగత అగౌరవం కాదని, అక్కడి పరిస్థితిని బట్టి అలా ప్రవర్తించానని తెలిపారు. అయితే, ఈ ఘటనపై రకుల్ ప్రీత్ సింగ్ ఇప్పటివరకు అధికారికంగా స్పందించలేదు.

'కెరటం' సినిమాతో టాలీవుడ్‌కు పరిచయమైన రకుల్, 'వెంకటాద్రి ఎక్స్‌ప్రెస్'తో మంచి గుర్తింపు తెచ్చుకున్నారు. ఆ తర్వాత 'లౌక్యం', 'సరైనోడు', 'ధృవ' వంటి చిత్రాలతో అగ్ర కథానాయికగా ఎదిగారు. ఈ ఏడాది నటుడు, నిర్మాత జాకీ భగ్నానీని వివాహం చేసుకున్న రకుల్, ప్రస్తుతం ముంబైలో స్థిరపడి బాలీవుడ్ ప్రాజెక్టులతో బిజీగా ఉన్నారు. ఆమె నటిస్తున్న 'దే దే ప్యార్ దే 2', 'రామాయణ' వంటి భారీ చిత్రాలు నిర్మాణ దశలో ఉన్నాయి. సరైన కథ దొరికితే మళ్లీ తెలుగులో నటించడానికి సిద్ధంగా ఉన్నట్లు తెలుస్తోంది.