వాళ్లను చూసి కూడా నేర్చుకోలేదు.. అహం పక్కనపెట్టాల్సింది: టీమిండియాపై గవాస్కర్ ఫైర్

టీ20 ప్రపంచకప్‌లో దక్షిణాఫ్రికా చేతిలో ఎదురైన ఘోర పరాజయంపై భారత బ్యాటింగ్ దిగ్గజం సునీల్ గవాస్కర్ తీవ్ర అసంతృప్తి వ్యక్తం చేశాడు. భారత బ్యాటర్లు తమ అహాన్ని, అతివిశ్వాసాన్ని పక్కనపెట్టి పరిస్థితులకు తగ్గట్టు ఆడటంలో పూర్తిగా విఫలమయ్యారని విమర్శించాడు. దక్షిణాఫ్రికా ఇన్నింగ్స్‌ను చూసి పాఠాలు నేర్చుకోవాల్సింది పోయి, ప్రతీ బంతిని బాదాలనే తొందరపాటుతో వికెట్లు చేజార్చుకున్నారని మండిపడ్డాడు. ఈ ఓటమితో టోర్నీలో భారత్ 12 మ్యాచ్‌ల అజేయ యాత్రకు తెరపడింది.

ఈ మ్యాచ్‌పై గవాస్కర్ మాట్లాడుతూ.. "మిల్లర్, బ్రెవిస్ భాగస్వామ్యం నిర్మించిన తీరును చూశాక, భారత బ్యాటర్లు అదే విధానాన్ని అనుసరించాల్సింది. కానీ, వారు అలా చేయలేదు. అతివిశ్వాసంతో క్రీజులోకి వచ్చి, ప్రతీ బంతికి బ్యాట్ ఝుళిపించి వికెట్లు సమర్పించుకున్నారు. దక్షిణాఫ్రికా తెలివిగా ఆడి భారత్‌ను ఓడించింది. ఈ విజయానికి వారు అన్ని విధాలా అర్హులు" అని పేర్కొన్నారు. ఈ మ్యాచ్‌లో దక్షిణాఫ్రికా 187 పరుగులు చేయగా, ఛేదనలో టీమిండియా 18.5 ఓవర్లలో 111 పరుగులకే కుప్పకూలి 76 పరుగుల తేడాతో ఓటమిపాలైంది.

భారత బ్యాటింగ్ వైఫల్యాన్ని విశ్లేషిస్తూ... "తిలక్ వర్మ చాలా తెలివైన బ్యాటర్. కానీ, ఈ మ్యాచ్‌లో అతడి ఆటతీరు నన్ను నిరాశపరిచింది. ఇషాన్ కిషన్ తొలి ఓవర్‌లోనే ఔటయ్యాడు. అప్పుడు అవసరమైన రన్‌రేట్ 9.5 మాత్రమే, 15 కాదు. తిలక్ మరికొంత సమయం తీసుకుని ఉండాల్సింది. మరోవైపు అభిషేక్ శర్మ వరుసగా డకౌట్లతో ఉన్నాడు. కాబట్టి క్రీజులో నిలబడి భాగస్వామ్యం నిర్మించాల్సిన బాధ్యత తిలక్‌పై ఉంది. కానీ, అతడు విఫలమయ్యాడు. పవర్‌ప్లేలో ఎప్పుడూ 70 పరుగులు చేయాల్సిన అవసరం లేదు. 55-60 పరుగులు చేసి ఉన్నా మంచి పునాది పడేది. కానీ, బాధ్యతారహితమైన ఆటతీరే భారత్ పతనానికి కారణమైంది" అని గవాస్కర్ విమర్శించాడు.

ఇక, జింబాబ్వేతో జరగనున్న తదుపరి మ్యాచ్‌కు జట్టులో మార్పులు చేయాలని గవాస్కర్ సూచించాడు. "జింబాబ్వే జట్టులో ఎక్కువమంది ఎడమచేతి వాటం బ్యాటర్లు లేనందున, అక్షర్ పటేల్‌ను తిరిగి జట్టులోకి తీసుకురావాలి. వాషింగ్టన్ సుందర్ స్థానంలో అతడిని ఆడించాలి. సుందర్‌ను జట్టు సరిగ్గా ఉపయోగించుకోవడం లేదు. దక్షిణాఫ్రికాతో మ్యాచ్‌లో కేవలం రెండు ఓవర్లు మాత్రమే బౌలింగ్ చేశాడు. నెదర్లాండ్స్‌పైనా వికెట్లు తీయలేదు. సుందర్‌కు సమయం ముగిసిందని భావిస్తున్నాను. అతడి స్థానంలో అక్షర్ పటేల్ కచ్చితంగా జట్టులోకి వస్తాడు" అని గవాస్కర్ అభిప్రాయపడ్డాడు.