ఏపీలో ఏసీబీకి దొరికిపోయిన ఇద్దరు లంచగొండి పోలీసు అధికారులు

ఆంధ్రప్రదేశ్‌లో అవినీతి నిరోధక శాఖ (ఏసీబీ) అధికారులు దూకుడు పెంచారు. లంచం తీసుకుంటున్న పోలీస్ అధికారులను రెడ్ హ్యాండెడ్‌గా పట్టుకున్నారు. వైఎస్సార్ కడప జిల్లాలో ఏకంగా పోలీస్ స్టేషన్‌లోనే రూ.3 లక్షలు లంచం తీసుకుంటున్న ఇద్దరు పోలీసు అధికారులను సోమవారం అరెస్ట్ చేయడం కలకలం రేపింది.

వివరాల్లోకి వెళితే, పులివెందుల రూరల్ సర్కిల్ ఇన్స్‌పెక్టర్ (సీఐ) ఎన్.వి. రమణ, సింహాద్రిపురం సబ్-ఇన్‌స్పెక్టర్ (ఎస్ఐ) దాసరి అనిల్ కుమార్.. చైన్ స్నాచింగ్ కేసులో నిందితుడిగా ఉన్న ఒక వ్యక్తి నుంచి రూ.4 లక్షలు లంచం డిమాండ్ చేశారు. దొంగిలించిన బైకులతో నేరాలకు పాల్పడుతున్న ఈ కేసులో అనుకూలంగా వ్యవహరిస్తామని వారు హామీ ఇచ్చారు. దీంతో బాధితుడు మొదట కొంత మొత్తం చెల్లించాడు. మిగిలిన డబ్బు కోసం పోలీసులు ఒత్తిడి చేయడంతో, అతను ఏసీబీని ఆశ్రయించాడు.

బాధితుడి ఫిర్యాదుతో రంగంలోకి దిగిన ఏసీబీ అధికారులు, సింహాద్రిపురం పోలీస్ స్టేషన్‌లో పక్కా ప్రణాళికతో వల పన్నారు. బాధితుడు రూ.3 లక్షలను ఎస్ఐ అనిల్ కుమార్‌కు అందజేస్తుండగా, అక్కడే మాటువేసిన ఏసీబీ అధికారులు అతడిని రెడ్ హ్యాండెడ్‌గా పట్టుకున్నారు. ఈ కేసుతో సంబంధం ఉన్న సీఐ రమణను కూడా అదుపులోకి తీసుకుని విచారణ చేపట్టారు.

ఇదే తరహాలో శ్రీకాకుళం జిల్లా ఇచ్ఛాపురంలో పదవీ విరమణ చేసిన ఉపాధ్యాయుడి నుంచి రూ.10,000 లంచం తీసుకుంటున్న మండల విద్యాధికారి (ఎంఈఓ) కుర్మాన అప్పారావు, డేటా ఎంట్రీ ఆపరేటర్ ఉప్పాడ కామేశ్వరరావును ఏసీబీ అధికారులు పట్టుకున్నారు. 

మరో ఘటనలో, విజయనగరం జిల్లా భోగాపురం మండలం సవరవిల్లి గ్రామ రెవెన్యూ అధికారి (వీఆర్ఓ) ఆర్. చిట్టిబాబు కూడా లంచం తీసుకుంటూ ఏసీబీకి చిక్కారు. అవినీతి అధికారులను పట్టుకోవడానికి సమాచార వ్యవస్థను బలోపేతం చేస్తామని ఏసీబీ డీజీ అతుల్ సింగ్ గత నెలలో చేసిన ప్రకటనకు అనుగుణంగా ఈ దాడులు జరగడం గమనార్హం.