గృహ నిర్బంధంలో ఉన్న కామారెడ్డి ఎమ్మెల్యేకి అస్వస్థత

గత కొన్ని రోజులుగా కామారెడ్డి నియోజకవర్గంలో భూ వివాదానికి సంబంధించిన ఆరోపణలు, వరుస సవాళ్లు, ప్రతి సవాళ్ల నేపథ్యంలో బీజేపీ ఎమ్మెల్యే వెంకటరమణారెడ్డి తీవ్ర అస్వస్థతకు గురయ్యారు. ఆయన జ్వరంతో బాధపడుతున్నారు. ప్రస్తుతం పోలీసులు ఆయనను గృహ నిర్బంధంలో ఉంచిన తరుణంలోనే ఈ అనారోగ్యం కలగడం స్థానికంగా చర్చనీయాంశమైంది.

ఎమ్మెల్యే అస్వస్థతకు గురయ్యారన్న సమాచారం అందుకున్న వైద్య బృందం ఆయన నివాసానికి చేరుకుని ప్రాథమిక వైద్య పరీక్షలు నిర్వహించింది. ప్రస్తుతం ఆయన ఆరోగ్య పరిస్థితి నిలకడగానే ఉందని, ఆందోళన చెందాల్సిన అవసరం లేదని వైద్యులు తెలిపారు. కోలుకోవడానికి మరో రెండు మూడు రోజుల పాటు పూర్తి విశ్రాంతి అవసరమని వారు సూచించారు.

మరోవైపు, డిగ్రీ కళాశాల భూముల వివాదంలో అధికార, ప్రతిపక్షాల మధ్య మాటల యుద్ధం నడుస్తుండటంతో కామారెడ్డిలో ఉద్రిక్తత కొనసాగుతోంది. ఈ క్రమంలోనే తమ నాయకుడి ఆరోగ్యం గురించి తెలుసుకునేందుకు బీజేపీ శ్రేణులు, కార్యకర్తలు ఆయన నివాసం వద్దకు చేరుకునే ప్రయత్నం చేస్తున్నారు. ఎమ్మెల్యే అస్వస్థతకు గురయ్యారన్న వార్తతో నియోజకవర్గ వ్యాప్తంగా బీజేపీ శ్రేణుల్లో ఆందోళన నెలకొంది. శాంతిభద్రతల దృష్ట్యా పోలీసులు ఆయన ఇంటి వద్ద పహారాను మరింత కట్టుదిట్టం చేశారు.