పిచ్‌పై సుందర్-మిల్లర్ మాటల యుద్ధం.. వీడియో ఇదిగో!

టీ20 ప్రపంచకప్‌లో దక్షిణాఫ్రికాతో జరిగిన కీలక మ్యాచ్‌లో భారత్ భారీ ఓటమిని ఎదుర్కొంది. అయితే, ఈ మ్యాచ్ ఫలితం కంటే భారత స్పిన్నర్ వాషింగ్టన్ సుందర్, సఫారీ బ్యాటర్ డేవిడ్ మిల్లర్ మధ్య జరిగిన వాగ్వాదమే ఎక్కువగా చర్చనీయాంశమైంది. మైదానంలో చోటుచేసుకున్న ఈ చిన్నపాటి గొడవ కాసేపు వేడిని రాజేసింది.

దక్షిణాఫ్రికా ఇన్నింగ్స్ సమయంలో ఈ ఘటన జరిగింది. సుందర్ బౌలింగ్ చేయడానికి వస్తున్నప్పుడు, నాన్-స్ట్రైకర్ ఎండ్‌లో ఉన్న మిల్లర్ బంతిని రిలీజ్ చేయకముందే క్రీజును దాటి ముందుకు వెళ్లాడు. దీన్ని గమనించిన సుందర్ తీవ్ర అభ్యంతరం వ్యక్తం చేశాడు. మిల్లర్ కూడా అంతే ఘాటుగా స్పందించడంతో ఇద్దరి మధ్య మాటల యుద్ధం చోటుచేసుకుంది. వెంటనే అంపైర్ క్రిస్ గాఫనీ కల్పించుకుని ఇద్దరికీ నచ్చజెప్పడంతో వివాదం సద్దుమణిగింది.

ఈ గొడవ తర్వాత డేవిడ్ మిల్లర్ మరింత కసిగా ఆడినట్లు కనిపించాడు. భారత బౌలర్లపై విరుచుకుపడుతూ కేవలం 35 బంతుల్లోనే 7 ఫోర్లు, 3 సిక్సర్లతో 63 పరుగులు చేశాడు. అతడి మెరుపు ఇన్నింగ్స్‌తో దక్షిణాఫ్రికా 20 ఓవర్లలో 187 పరుగుల భారీ స్కోరును నమోదు చేసింది.

188 పరుగుల భారీ లక్ష్యంతో బరిలోకి దిగిన టీమిండియా ఆరంభం నుంచే తడబడింది. ఇషాన్ కిషన్ డకౌట్‌తో మొదలైన వికెట్ల పతనం ఆగలేదు. భారత బ్యాటర్లు ఎవరూ రాణించకపోవడంతో 111 పరుగులకే ఆలౌట్ అయింది. ఫలితంగా 76 పరుగుల తేడాతో భారత్ ఘోర పరాజయం పాలైంది. ఈ ఓటమితో గ్రూప్-1 పాయింట్ల పట్టికలో భారత్ నెట్ రన్ రేట్ భారీగా దెబ్బతిని మైనస్‌లోకి పడిపోయింది. సెమీస్ ఆశలు సజీవంగా ఉండాలంటే, తదుపరి మ్యాచ్‌లో జింబాబ్వేపై భారీ తేడాతో గెలవడం తప్పనిసరి.