పెళ్లింట పెను విషాదం.. ప్రియురాలి బ్లాక్ మెయిలింగ్ తట్టుకోలేక వ్యాపారి ఆత్మహత్య!

కుమార్తె వివాహానికి కొన్ని రోజుల ముందు ఓ తండ్రి ఆత్మహత్య చేసుకోవడం సూరత్‌లో తీవ్ర కలకలం రేపింది. ఓ మహిళ బ్లాక్‌మెయిల్ చేసి, ఆర్థికంగా వేధించడమే ఈ దారుణానికి కారణమని తేలడంతో పోలీసులు నిందితురాలిని అరెస్ట్ చేశారు. పెళ్లి పనులతో సందడిగా ఉండాల్సిన ఇంట్లో ఈ ఘటన తీవ్ర విషాదాన్ని నింపింది.

సూరత్‌కు చెందిన వ్యాపారి ఘేలానీ జనవరి 31వ తేదీ రాత్రి తన లైసెన్స్‌డ్ రివాల్వర్‌తో మెడపై కాల్చుకున్నారు. కుటుంబ సభ్యులు వెంటనే ఆయన్ను ఆసుపత్రికి తరలించగా, చికిత్స పొందుతూ ఫిబ్రవరి 4న మృతి చెందారు. తండ్రి మరణం వెనుక పూనమ్ బెన్ భదౌరియా అనే మహిళ ఉందని ఆరోపిస్తూ మృతుడి కుమార్తె ఫిబ్రవరి 12న పోలీసులకు ఫిర్యాదు చేశారు. తన పెళ్లికి ముందు పూనమ్ గొడవ చేస్తుందేమోనని నాన్న భయపడ్డారని, ఆమె వలలో చిక్కుకున్నట్లు తనతో చెప్పారని కుమార్తె పోలీసులకు వివరించారు.

ఈ ఫిర్యాదుతో రంగంలోకి దిగిన ఉమ్రా పోలీసులు.. ఘేలానీ, పూనమ్ మధ్య చాలా ఏళ్లుగా రహస్య సంబంధం ఉన్నట్లు గుర్తించారు. ఆయన బ్యాంకు ఖాతా నుంచి ఆమెకు పెద్ద మొత్తంలో డబ్బు బదిలీ అయినట్లు ఆధారాలు సేకరించారు. ఆర్థిక వేధింపులు, బ్లాక్‌మెయిలే ఆత్మహత్యకు కారణమని ప్రాథమిక నిర్ధారణకు వచ్చిన పోలీసులు.. ఆత్మహత్యకు ప్రేరేపించిన అభియోగంపై (సెక్షన్ 306) పూనమ్‌ను ఆదివారం అరెస్ట్ చేశారు. ఈ వ్యవహారంలో ఇంకెవరైనా ఉన్నారా? అనే కోణంలో దర్యాప్తు కొనసాగిస్తున్నారు.