మహీకా శర్మతో హార్దిక్ పాండ్యా రిలేషన్.. మాజీ భార్య స్పందన

టీమిండియా స్టార్ ఆల్‌రౌండర్ హార్దిక్ పాండ్యాతో విడిపోయిన తర్వాత నటి, మోడల్ నటాషా స్టాంకోవిచ్ సోషల్ మీడియాలో పెట్టిన ఓ పోస్ట్ ఇప్పుడు విస్తృతంగా చర్చనీయాంశంగా మారింది. తన మాజీ భర్త హార్దిక్ పాండ్యా కొత్త బంధాన్ని దాదాపుగా బహిర్గతం చేసిన తరుణంలో... "శాంతి నాకు మౌనాన్ని నేర్పింది" అంటూ ఆమె చేసిన వ్యాఖ్యలు ప్రాధాన్యత సంతరించుకున్నాయి.

నటాషా తాజాగా తన ఇన్‌స్టాగ్రామ్‌లో ఓ వీడియోను పంచుకున్నారు. ఓ స్విమ్మింగ్ పూల్ పక్కన, సాయంత్రం వేళ వెలుగుల మధ్య షకీరా పాటకు ఎంతో అందంగా, హుందాగా డ్యాన్స్ చేస్తున్న దృశ్యాలు ఆ వీడియోలో ఉన్నాయి. దీనికి ఆమె ఓ ఆలోచనాత్మకమైన వ్యాఖ్యను జోడించారు. "ఉపశమనం గోప్యతను నేర్పింది. ఎదుగుదల ప్రమాణాలను నేర్పింది. శాంతి నాకు మౌనాన్ని నేర్పింది. ఇప్పుడు జీవితంలో నేను విభిన్నంగా డ్యాన్స్ చేస్తున్నాను" అని రాసుకొచ్చారు.

హార్దిక్ పాండ్యా తన కొత్త బంధాన్ని సోషల్ మీడియా వేదికగా దాదాపు అధికారికంగా ప్రకటించిన తరుణంలోనే నతాషా ఈ పోస్ట్ పెట్టడం గమనార్హం. మహికా శర్మ అనే అమ్మాయితో హార్దిక్ ప్రేమలో ఉన్నట్టు కొంతకాలంగా ఊహాగానాలు వినిపిస్తున్నాయి. ఇటీవల మహికా పుట్టినరోజు సందర్భంగా హార్దిక్ ఆమెతో కలిసి వేడుకలు జరుపుకోవడం, ప్రత్యేకంగా పోస్ట్ పెట్టడంతో అతను జీవితంలో ముందుకు సాగి, కొత్త అధ్యాయం ప్రారంభించడానికి సిద్ధంగా ఉన్నాడనే సంకేతాలు స్పష్టమయ్యాయి. ఈ నేపథ్యంలోనే నటాషా పోస్ట్ వైరల్‌గా మారింది.

2020లో హార్దిక్, నటాషా రహస్యంగా వివాహం చేసుకున్నారు. వీరికి అగస్త్య అనే కుమారుడు ఉన్నాడు. 2023 ఫిబ్రవరిలో వీరు మరోసారి అంగరంగ వైభవంగా వివాహ వేడుక జరుపుకున్నారు. అయితే, ఈ ఏడాది ఆరంభంలో అందరికీ షాక్ ఇస్తూ తాము విడిపోతున్నట్లు ప్రకటించారు. విడిపోయినప్పటికీ, తమ కుమారుడు అగస్త్య కోసం వీరిద్దరూ అప్పుడప్పుడు కలుస్తూ బాధ్యతగల తల్లిదండ్రులుగా వ్యవహరిస్తున్నారు. ఇటీవల హార్దిక్ తన కుమారుడికి సుమారు రూ. 4 కోట్ల విలువైన లగ్జరీ కారును బహుమతిగా ఇచ్చాడని వార్తలు వచ్చాయి. అయితే ఈ వార్తలపై హార్దిక్ గానీ, నటాషా గానీ అధికారికంగా స్పందించలేదు.