శ్రీ విష్ణు 'మృత్యుంజయ్' రిలీజ్ డేట్ మారింది... ఆ సినిమా కోసమే!

ప్రముఖ నటుడు శ్రీ విష్ణు ప్రధాన పాత్రలో నటిస్తున్న ఇన్వెస్టిగేటివ్ థ్రిల్లర్ 'మృత్యుంజయ్' విడుదల తేదీలో మార్పు జరిగింది. ముందుగా ప్రకటించినట్టు ఫిబ్రవరి 27న కాకుండా, ఈ చిత్రాన్ని మార్చి 6న ప్రపంచవ్యాప్తంగా థియేటర్లలో విడుదల చేయనున్నట్లు చిత్ర బృందం అధికారికంగా ప్రకటించింది.
ఈ విషయాన్ని హీరో శ్రీ విష్ణు తన అధికారిక ఎక్స్ ఖాతా ద్వారా వెల్లడించారు. "రిలీజ్ డేట్ మారింది, థ్రిల్ కాదు" అనే ఆసక్తికరమైన క్యాప్షన్‌తో ఓ కొత్త పోస్టర్‌ను పంచుకున్నారు. ఈ పోస్టర్‌లో శ్రీ విష్ణు భయంకరమైన ఆయుధంతో ఇంటెన్స్ లుక్‌లో కనిపిస్తూ సినిమాపై అంచనాలను పెంచారు. 

హుస్సేన్ షా కిరణ్ ఈ చిత్రానికి రచన, దర్శకత్వం వహిస్తుండగా, సందీప్ గున్నం, వినయ్ చిలకపాటి నిర్మాతలుగా వ్యవహరిస్తున్నారు. శ్రీ విష్ణుకు జోడీగా రెబా మోనికా జాన్ నటిస్తోంది. కాల భైరవ సంగీతం అందిస్తున్నారు. ఈ సినిమా టీజర్‌కు ఇప్పటికే అద్భుతమైన స్పందన వచ్చింది. ప్రముఖ దర్శకుడు ఎస్.ఎస్. రాజమౌళి సైతం టీజర్‌ను ప్రశంసించడం విశేషం.

శ్రీ విష్ణు నటిస్తున్న మరో చిత్రం 'విష్ణు విన్యాసం' కూడా విడుదలకు సిద్ధమవుతోంది. 'విష్ణు విన్యాసం' ఫిబ్రవరి 28న ప్రేక్షకుల ముందుకు వస్తోంది. ఈ నేపథ్యంలో రెండు సినిమాల ప్రమోషన్లకు ఇబ్బంది లేకుండా ఉండేందుకే 'మృత్యుంజయ్' విడుదల తేదీని మార్చినట్లు తెలుస్తోంది. మరి మార్చి 6న థియేటర్లలోకి రానున్న ఈ ఇన్వెస్టిగేటివ్ థ్రిల్లర్ ప్రేక్షకులను ఏ స్థాయిలో ఆకట్టుకుంటుందో చూడాలి.