వీర రాజా వీర’ పాట వివాదం.. క్రెడిట్ ఇచ్చేందుకు ఏఆర్ రెహమాన్ అంగీకారం

ప్రముఖ సంగీత దర్శకుడు ఏఆర్ రెహమాన్‌కు సంబంధించిన ఓ కాపీరైట్ వివాదం సుప్రీంకోర్టులో ముగింపు దశకు వచ్చింది. మణిరత్నం దర్శకత్వంలో వచ్చిన ‘పొన్నియిన్ సెల్వన్-2’ చిత్రంలోని ‘వీర రాజా వీర’ పాటను, దగర్ కుటుంబానికి చెందిన సంప్రదాయ ‘శివ స్తుతి’ నుంచి స్ఫూర్తి పొంది స్వరపరిచినట్లు అంగీకరించేందుకు రెహమాన్ ఒప్పుకున్నారు. ఈ మేరకు ఆయన సుప్రీంకోర్టుకు హామీ ఇచ్చారు.

శుక్రవారం ఈ కేసు విచారణకు రాగా, రెహమాన్ తరఫున సీనియర్ న్యాయవాది అభిషేక్ మను సింఘ్వీ వాదనలు వినిపించారు. దివంగత ఉస్తాద్ ఎన్. ఫయాజుద్దీన్ దగర్, ఉస్తాద్ ఎన్. జహిరుద్దీన్ దగర్ (జూనియర్ దగర్ సోదరులు) ప్రదర్శనను గుర్తిస్తూ పాటకు క్రెడిట్ ఇచ్చేందుకు రెహమాన్ అంగీకరించారని తెలిపారు. అయితే, ఢిల్లీ హైకోర్టులో నడుస్తున్న ప్రధాన సివిల్ దావాలో తమ హక్కులకు ఎలాంటి భంగం కలగని రీతిలో ఈ తాత్కాలిక ఏర్పాటుకు ఒప్పుకున్నట్లు స్పష్టం చేశారు.

ఈ వాదనలను నమోదు చేసుకున్న భారత ప్రధాన న్యాయమూర్తి (సీజేఐ) సూర్యకాంత్ నేతృత్వంలోని ధర్మాసనం, ఐదు వారాల్లోగా అన్ని సోషల్ మీడియా, ఓటీటీ ప్లాట్‌ఫామ్స్‌లో పాట క్రెడిట్స్‌లో ఈ మార్పులు చేయాలని ఆదేశించింది. ఈ తాత్కాలిక ఒప్పందం వల్ల హైకోర్టులోని సివిల్ సూట్‌పై ఎలాంటి ప్రభావం ఉండదని, ఆ కేసు మెరిట్స్ ఆధారంగానే విచారణ కొనసాగుతుందని స్పష్టం చేసింది.

శాస్త్రీయ గాయకుడు ఉస్తాద్ ఫయాజ్ వాసిఫుద్దీన్ దగర్ ఈ పిటిషన్‌ను దాఖలు చేశారు. గతంలో ఢిల్లీ హైకోర్టు.. రెహమాన్‌కు అనుకూలంగా తీర్పు ఇవ్వడంతో, దానిని సవాలు చేస్తూ ఆయన సుప్రీంకోర్టును ఆశ్రయించారు. తాజా హామీతో సుప్రీంకోర్టు ఈ స్పెషల్ లీవ్ పిటిషన్‌ను పరిష్కరించింది. గత విచారణలో, భారత శాస్త్రీయ సంగీతానికి దగర్వాణీ సంప్రదాయం ఎనలేని సేవలందించిందని సీజేఐ ప్రశంసించడం గమనార్హం.