టీ20 వరల్డ్ కప్: సూపర్-8లో టీమిండియా ప్రత్యర్థులు వీరే!

టీ20 ప్రపంచకప్ 2026లో భారత జట్టు సూపర్-8 దశకు అర్హత సాధించింది. ఆదివారం కొలంబోలో పాకిస్థాన్‌తో జరిగిన మ్యాచ్‌లో 61 పరుగుల భారీ తేడాతో గెలిచి, గ్రూప్-ఏలో అగ్రస్థానాన్ని పదిలం చేసుకుంది. ఇప్పటివరకు ఆడిన మూడు మ్యాచ్‌ల్లోనూ విజయం సాధించి సూర్యకుమార్ యాదవ్ నేతృత్వంలోని జట్టు అజేయంగా నిలిచింది.

సూపర్-8 గ్రూప్‌లో డిఫెండింగ్ ఛాంపియన్ భారత్‌తో పాటు గత సీజన్ రన్నరప్ దక్షిణాఫ్రికా, వెస్టిండీస్, జింబాబ్వే జట్లు ఉన్నాయి. ఐర్లాండ్‌తో జరగాల్సిన మ్యాచ్ వర్షం కారణంగా రద్దు కావడంతో జింబాబ్వే సూపర్-8 బెర్తును ఖాయం చేసుకుంది. సెమీఫైనల్స్‌కు చేరేందుకు ఈ దశలో గెలుపు అత్యంత కీలకం కానుంది.

భారత సూపర్-8 మ్యాచ్‌ల షెడ్యూల్

ఫిబ్రవరి 22 (ఆదివారం): భారత్ vs దక్షిణాఫ్రికా (నరేంద్ర మోదీ స్టేడియం, అహ్మదాబాద్) 
ఫిబ్రవరి 26 (గురువారం): భారత్ vs జింబాబ్వే (ఎంఏ చిదంబరం స్టేడియం, చెన్నై) 
మార్చి 1 (ఆదివారం): భారత్ vs వెస్టిండీస్ (ఈడెన్ గార్డెన్స్, కోల్‌కతా)

ఈ మ్యాచ్‌లన్నీ భారత కాలమానం ప్రకారం సాయంత్రం 7:00 గంటలకు ప్రారంభమవుతాయి. ఈ కీలక పోరులన్నీ భారత్‌లోనే జరగనుండటం టీమిండియాకు కలిసొచ్చే అంశం. గ్రూప్ దశలో తన చివరి మ్యాచ్‌ను ఫిబ్రవరి 18న నెదర్లాండ్స్‌తో అహ్మదాబాద్‌లోనే ఆడనుంది. సూపర్-8 తొలి మ్యాచ్ కూడా అదే వేదికపై జరగనుండటంతో జట్టుకు సన్నద్ధమయ్యేందుకు వెసులుబాటు లభిస్తుంది. భారత్, శ్రీలంక సంయుక్తంగా ఆతిథ్యమిస్తున్న ఈ టోర్నీ సెమీఫైనల్స్ ముంబై, కొలంబోలో జరగనున్నాయి.