టీ20 ప్రపంచకప్‌లో బోణీ కొట్టిన ఆతిథ్య శ్రీలంక... ఐర్లాండ్‌పై ఘన విజయం

టీ20 ప్రపంచకప్‌లో ఆతిథ్య శ్రీలంక గెలుపు బోణీ కొట్టింది. కొలంబోలోని ప్రేమదాస స్టేడియంలో ఆదివారం జరిగిన గ్రూప్-బి మ్యాచ్‌లో ఐర్లాండ్‌పై 20 పరుగుల తేడాతో విజయం సాధించింది. తొలుత బ్యాటింగ్, ఆ తర్వాత బౌలింగ్‌లో సమష్టిగా రాణించి టోర్నీలో శుభారంభం చేసింది. 164 పరుగుల లక్ష్య ఛేదనలో ఐర్లాండ్ 19.5 ఓవర్లలో 143 పరుగులకు ఆలౌట్ అయింది.

టాస్ ఓడి బ్యాటింగ్‌కు దిగిన శ్రీలంకకు ఆరంభంలోనే ఎదురుదెబ్బలు తగిలినా, వికెట్ కీపర్ కుశాల్ మెండిస్ (43 బంతుల్లో 56 నాటౌట్) బాధ్యతాయుతమైన ఇన్నింగ్స్‌తో ఆకట్టుకున్నాడు. చివరి ఓవర్లలో కమిందు మెండిస్ (19 బంతుల్లో 44) మెరుపు ఇన్నింగ్స్ ఆడటంతో లంక స్కోరు ఊపందుకుంది. వీరిద్దరి ప్రదర్శనతో శ్రీలంక నిర్ణీత 20 ఓవర్లలో 6 వికెట్ల నష్టానికి 163 పరుగులు చేసింది. ఐర్లాండ్ బౌలర్లలో జార్జ్ డాక్‌రెల్, బారీ మెక్‌కార్తీ చెరో రెండు వికెట్లు పడగొట్టారు.

అనంతరం లక్ష్య ఛేదనకు దిగిన ఐర్లాండ్‌ను లంక స్పిన్నర్లు వణికించారు. రాస్ అడైర్ (34), హ్యారీ టెక్టర్ (40) పోరాడినప్పటికీ, కీలక సమయాల్లో వికెట్లు కోల్పోయింది. స్పిన్ ద్వయం వనిందు హసరంగ (3/25), మహీశ్ తీక్షణ (3/23) ఐర్లాండ్ పతనాన్ని శాసించారు. వీరి ధాటికి ఐరిష్ బ్యాటర్లు వరుసగా పెవిలియన్‌కు క్యూ కట్టారు. ఆఖరి ఓవర్లో యువ పేసర్ మతీశ పతిరణ రెండు వికెట్లు తీసి ఐర్లాండ్ ఇన్నింగ్స్ కు ముగింపు పలికాడు. దీంతో ఐర్లాండ్ జట్టు లక్ష్యానికి 20 పరుగుల దూరంలో నిలిచిపోయింది. ఈ విజయంతో శ్రీలంక టోర్నీలో తమ ప్రయాణాన్ని ఘనంగా ఆరంభించింది.