భారత్‌లో అమ్మకాలు పెంచుకునేందుకు టెస్లా కొత్త ప్రణాళిక

భారత మార్కెట్లో అమ్మకాలను పెంచుకునేందుకు ఎలాన్ మస్క్ కు చెందిన ఎలక్ట్రిక్ వాహన దిగ్గజం టెస్లా సరికొత్త ప్రణాళికతో ముందుకొచ్చింది. ఆశించిన స్థాయిలో విక్రయాలు జరగకపోవడంతో, వినియోగదారులను ఆకర్షించేందుకు ఈఎంఐ పద్ధతి, ఎక్స్చేంజ్ ప్రోత్సాహకాలను ప్రకటించింది. ఈ మేరకు ఢిల్లీలో కంపెనీ కీలక ప్రకటన చేసింది.

వివరాల్లోకి వెళితే, టెస్లా మోడల్ వై కారును కొనుగోలు చేసేవారికి రూ.6 లక్షల డౌన్ పేమెంట్ తో, నెలకు రూ.49 వేల సులభ ఈఎంఐతో సొంతం చేసుకునే అవకాశాన్ని కల్పించింది. అంతేకాకుండా, పాత పెట్రోల్ లేదా డీజిల్ కార్లను మార్పిడి చేసుకునే వారికి రూ.3 లక్షల వరకు ప్రోత్సాహకాన్ని అందిస్తోంది. ఈ కొత్త పథకాల ద్వారా ప్రీమియం ఎలక్ట్రిక్ కార్లను ఎక్కువ మందికి అందుబాటులోకి తీసుకురావాలని కంపెనీ భావిస్తోంది.

సాధారణ కార్లతో పోలిస్తే టెస్లా కారు వాడకం వల్ల ఇంధనం, నిర్వహణ ఖర్చుల రూపంలో నెలకు రూ.20 వేల వరకు ఆదా అవుతుందని కంపెనీ పేర్కొంది. దీనివల్ల నెలవారీ వాయిదా భారం వాస్తవానికి రూ.29 వేలకు తగ్గుతుందని వివరించింది.

గతేడాది భారత్‌లో అడుగుపెట్టిన టెస్లా మోడల్ వై కారుకు తొలుత మంచి స్పందన లభించినా, అధిక ధర కారణంగా అమ్మకాలు మందగించాయి. గత సంవత్సరం మొత్తం మీద కేవలం 225 కార్లను మాత్రమే విక్రయించింది. ఇదే సమయంలో బీఎండబ్ల్యూ, బీవైడీ వంటి పోటీ సంస్థలు ఆకర్షణీయమైన ఫీచర్లతో కార్లను అందిస్తుండటంతో టెస్లాకు గట్టి పోటీ ఎదురైంది. ఈ నేపథ్యంలో, తమ అమ్మకాలను పెంచుకుని మార్కెట్లో స్థానాన్ని పటిష్ఠం చేసుకునేందుకు టెస్లా ఈ కొత్త చర్యలు చేపట్టింది.