రష్యా చమురు కొనుగోలును భారత్ నిలిపివేస్తుందా?.. తమకేమీ సమాచారం లేదన్న పుతిన్ సన్నిహితుడు

అమెరికాతో వాణిజ్య ఒప్పందం నేపథ్యంలో, రష్యా నుంచి చమురు కొనుగోళ్లను నిలిపివేయాలని భారత్ నిర్ణయించుకున్నట్లు వస్తున్న వార్తలపై రష్యా స్పందించింది. ఈ విషయంపై భారత ప్రభుత్వం నుంచి తమకు ఎలాంటి అధికారిక సమాచారం అందలేదని రష్యా అధ్యక్ష భవనం అధికార ప్రతినిధి, పుతిన్ సన్నిహితుడు దిమిత్రి పెస్కోవ్ మంగళవారం స్పష్టం చేశారు. అమెరికా అధ్యక్షుడు డొనాల్డ్ ట్రంప్ ప్రకటనలను నిశితంగా గమనిస్తున్నామని, వాటిని విశ్లేషిస్తున్నామని ఆయన తెలిపారు.

రష్యా నుంచి భారత్ చమురు కొనుగోళ్లు ఆపేస్తే, భారత ఉత్పత్తులపై ఉన్న 25 శాతం సుంకాన్ని (టారిఫ్) తొలగిస్తామని అమెరికా సోమవారం ప్రకటించిన విషయం తెలిసిందే. అమెరికా అధ్యక్షుడు డొనాల్డ్ ట్రంప్, భారత ప్రధాని నరేంద్ర మోదీ మధ్య జరిగిన ఫోన్ సంభాషణ తర్వాత వైట్‌హౌస్ ఈ ప్రకటన చేసింది. రష్యా చమురు కొనడం ఆపి, అమెరికా నుంచి కొనుగోళ్లు పెంచడానికి ప్రధాని మోదీ అంగీకరించారని ట్రంప్ తన 'ట్రూత్ సోషల్' ఖాతాలో పేర్కొన్నారు.

అయితే, ప్రధాని మోదీ తన ఎక్స్ ఖాతాలో "మేడ్ ఇన్ ఇండియా ఉత్పత్తులపై సుంకం 18 శాతానికి తగ్గడం సంతోషకరం" అని మాత్రమే ప్రస్తావించారు. రష్యా చమురు గురించి ఆయన ఎలాంటి వ్యాఖ్య చేయలేదు.

ఈ పరిణామాలపై పెస్కోవ్ మాట్లాడుతూ, "అమెరికా-భారత్ ద్వైపాక్షిక సంబంధాలను మేం గౌరవిస్తాం. అదే సమయంలో భారత్‌తో మా వ్యూహాత్మక భాగస్వామ్యాన్ని అభివృద్ధి చేసుకోవడానికి అత్యంత ప్రాధాన్యత ఇస్తాం. ఇరు దేశాల సంబంధాలను అన్ని విధాలా ముందుకు తీసుకెళ్తాం" అని రష్యా ప్రభుత్వ వార్తా సంస్థ టాస్‌తో అన్నారు. ఉక్రెయిన్‌పై యుద్ధం నేపథ్యంలో రష్యాకు చమురు ఆదాయాన్ని అడ్డుకోవాలని అమెరికా ప్రయత్నిస్తున్న సంగతి తెలిసిందే.