యాంకర్ శివజ్యోతి ప్రెగ్నెన్సీపై పుకార్లు... తీవ్రంగా స్పందించిన శివజ్యోతి

బిగ్‌బాస్‌తో గుర్తింపు తెచ్చుకుని, యాంకర్‌గా మంచి ఫాలోయింగ్ సంపాదించుకున్న శివజ్యోతి త్వరలోనే తల్లి కాబోతున్న సంగతి తెలిసిందే. పెళ్లైన దాదాపు పదేళ్ల తర్వాత ఆమె గర్భం దాల్చడంతో అభిమానులు, శ్రేయోభిలాషులు ఆనందం వ్యక్తం చేస్తున్నారు. అయితే ఈ సంతోషకరమైన సమయంలోనే శివజ్యోతి ప్రెగ్నెన్సీపై సోషల్ మీడియాలో అనవసరమైన పుకార్లు మొదలయ్యాయి.

శివజ్యోతి సహజంగా గర్భం దాల్చలేదని, ఐవీఎఫ్ లేదా ఐయూఐ వంటి వైద్య పద్ధతుల ద్వారా తల్లి కాబోతున్నారని కొన్ని యూట్యూబ్ ఛానళ్లు థంబ్‌నెయిల్స్‌తో తప్పుడు ప్రచారం చేయడం మొదలుపెట్టాయి. ఈ వార్తలు ఆమె దృష్టికి వెళ్లడంతో శివజ్యోతి తీవ్రంగా స్పందించారు. తాజాగా ఓ వీడియో విడుదల చేసి అసలు నిజాన్ని వెల్లడించారు.

తమకు పెళ్లై పదేళ్లు అయినా, వ్యక్తిగత కారణాల వల్ల 2023 వరకు పిల్లల గురించి ఆలోచించలేదని ఆమె స్పష్టం చేశారు. పిల్లల కోసం నిర్ణయం తీసుకున్న తర్వాత రెండున్నరేళ్ల పాటు అనేక ఆసుపత్రులు తిరిగామని, చెట్ల మందులు (మూలికా వైద్యం) వాడామని, దేవుడికి మొక్కులు మొక్కుకున్నామని తెలిపారు. చివరికి తిరుపతి వేంకటేశ్వర స్వామి వ్రతం చేసిన తర్వాతే తాను సహజంగా గర్భం దాల్చినట్లు చెప్పారు.

అలాగే, ఒకవేళ ఐవీఎఫ్ చేయించుకున్నా అందులో తప్పేమీ లేదని, అలా జరిగి ఉంటే దాన్ని దాచే అవసరం తనకు లేదని ధైర్యంగా చెప్పారు. “నా శరీరం నా ఇష్టం. నాకు నచ్చినప్పుడు, నేను సిద్ధంగా ఉన్నప్పుడే తల్లి కావాలని నిర్ణయించుకున్నాను” అంటూ అసత్య ప్రచారాలపై ఘాటుగా స్పందించారు.

ప్రస్తుతం తాను ఏడు నెలల గర్భవతినని వెల్లడించిన శివజ్యోతి, డాక్టర్ల సూచనల మేరకే రిపోర్టులను బయట పెట్టలేదని స్పష్టం చేశారు. తన వ్యక్తిగత జీవితంపై తప్పుడు వార్తలు ప్రచారం చేసే వారికి ఇది చివరి హెచ్చరిక అంటూ స్ట్రాంగ్ వార్నింగ్ కూడా ఇచ్చారు.