తెలుగు విశ్వవిద్యాలయం డిస్టెన్స్ ఎడ్యుకేషన్... ఆన్ లైన్ దరఖాస్తులకు ఆహ్వానం

హైదరాబాద్‌లోని సురవరం ప్రతాపరెడ్డి తెలుగు విశ్వవిద్యాలయం, దూర విద్యా కేంద్రం 2026 విద్యా సంవత్సరానికి గాను వివిధ కోర్సుల్లో ప్రవేశ ప్రక్రియను ప్రారంభించింది. పీజీ డిప్లొమా, డిప్లొమా, సర్టిఫికెట్ కోర్సుల్లో అడ్మిషన్ల కోసం అర్హులైన అభ్యర్థుల నుంచి ఆన్‌లైన్ దరఖాస్తులను ఆహ్వానిస్తున్నట్లు దూర విద్యా కేంద్రం డైరెక్టర్ ఆచార్య పద్మప్రియ శుక్రవారం ఒక ప్రకటనలో తెలిపారు.

ఆసక్తి కలిగిన అభ్యర్థులు విశ్వవిద్యాలయ అధికారిక వెబ్‌సైట్ ద్వారా తమ దరఖాస్తులను సమర్పించాల్సి ఉంటుంది. ఎటువంటి ఆలస్య రుసుము లేకుండా మార్చి 31వ తేదీ వరకు దరఖాస్తు చేసుకునేందుకు అవకాశం కల్పించారు. ఒకవేళ నిర్ణీత గడువులోగా దరఖాస్తు చేయని వారు, ఏప్రిల్ 30వ తేదీ వరకు ఆలస్య రుసుముతో దరఖాస్తు చేసుకోవచ్చు.

ప్రవేశం కోరుకునే కోర్సుల వివరాలు, విద్యార్హతలు, ఫీజులు తదితర పూర్తి సమాచారం కోసం అభ్యర్థులు https://www.pstucet.org వెబ్‌సైట్‌ను సందర్శించాలని సూచించారు. అదనపు సమాచారం కోసం నాంపల్లిలోని దూర విద్యా కేంద్రాన్ని నేరుగా సంప్రదించవచ్చు లేదా 73306 23411 నంబరుకు ఫోన్ చేసి వివరాలు తెలుసుకోవచ్చని డైరెక్టర్ పేర్కొన్నారు.