యువ నేతకు బీజేపీ పగ్గాలు.. జాతీయ అధ్యక్ష బాధ్యతలు చేపట్టిన నితిన్ నబిన్

బీజేపీ నూతన జాతీయ అధ్యక్షుడిగా సీనియర్ నేత నితిన్ నబిన్ బాధ్యతలు స్వీకరించారు. ఇప్పటివరకు ఆ పదవిలో ఉన్న జగత్ ప్రకాశ్ నడ్డా స్థానంలో ఆయన నియమితులయ్యారు. క్షేత్రస్థాయి నుంచి జాతీయ స్థాయి వరకు జరిగిన విస్తృతమైన అంతర్గత ఎంపిక ప్రక్రియ తర్వాత పార్టీ ఈ నిర్ణయం తీసుకుంది.

45 ఏళ్ల నితిన్ నబిన్‌కు పార్టీ పగ్గాలు అప్పగించడం, రాబోయే ఎన్నికల వ్యూహంలో కీలక భాగంగా కనిపిస్తోంది. పశ్చిమ బెంగాల్, తమిళనాడు, అస్సాం, ఉత్తరప్రదేశ్‌లలో జరగనున్న అసెంబ్లీ ఎన్నికలతో పాటు 2029 సార్వత్రిక ఎన్నికలను దృష్టిలో ఉంచుకుని, సంస్థాగత బలోపేతానికి, తరాల మార్పునకు బీజేపీ ప్రాధాన్యత ఇస్తోందనడానికి ఈ నియామకం ఒక సంకేతమని రాజకీయ వర్గాలు భావిస్తున్నాయి.

కాంగ్రెస్ అధ్యక్షుడు ఖర్గేతో వయసు పోలికపై విశ్లేషణలు
మరోవైపు ఈ నియామకాన్ని బీజేపీ ప్రధాన ప్రత్యర్థి కాంగ్రెస్‌తో పోలుస్తూ కూడా విశ్లేషణలు వస్తున్నాయి. కాంగ్రెస్ పార్టీకి 84 ఏళ్ల మల్లికార్జున ఖర్గే నాయకత్వం వహిస్తుండగా, బీజేపీ మాత్రం 45 ఏళ్ల యువనేతకు అధ్యక్ష పదవిని కట్టబెట్టడం వ్యూహాత్మక మార్పు అని పార్టీ వర్గాలు పేర్కొంటున్నాయి. దీని ద్వారా యువతకు ప్రాధాన్యం ఇస్తున్నామనే బలమైన సందేశాన్ని పంపాలని బీజేపీ భావిస్తున్నట్లు స్పష్టమవుతోంది.