MK Stalin: జల్లికట్టు వీరులకు ప్రభుత్వ ఉద్యోగాలు... సీఎం స్టాలిన్ కీలక ప్రకటన

తమిళనాడు ముఖ్యమంత్రి ఎంకే స్టాలిన్ శనివారం ప్రపంచ ప్రఖ్యాత అలంగనల్లూరు జల్లికట్టు వేడుకల్లో పాల్గొని రెండు కీలక ప్రకటనలు చేశారు. అత్యధిక ఎద్దులను అదుపు చేసిన జల్లికట్టు వీరులకు పశుసంవర్థక, అనుబంధ రంగాల్లో ప్రభుత్వ ఉద్యోగాల్లో ప్రాధాన్యం కల్పిస్తామని ప్రకటించారు. అలాగే, రూ. 2 కోట్ల వ్యయంతో అలంగనల్లూరులో జల్లికట్టు ఎద్దుల కోసం ఒక అత్యాధునిక శిక్షణా, చికిత్సా కేంద్రాన్ని ఏర్పాటు చేయనున్నట్లు తెలిపారు.

పొంగల్ పండుగ వేడుకల్లో భాగంగా జరిగిన ఈ కార్యక్రమానికి చెన్నై నుంచి మధురై చేరుకున్న సీఎం స్టాలిన్‌కు మంత్రి మూర్తి, జిల్లా కలెక్టర్ ప్రవీణ్ కుమార్ స్వాగతం పలికారు. అనంతరం వాడివాసల్ సమీపంలో ఏర్పాటు చేసిన ప్రత్యేక వేదికపై నుంచి ఆయన పోటీలను ఆసక్తిగా తిలకించారు. విజేతలైన క్రీడాకారులకు, ఎద్దుల యజమానులకు బంగారు ఉంగరాలను బహూకరించారు.

జనవరి 15న పొంగల్ రోజున అవనియాపురంలో జల్లికట్టు సీజన్ ప్రారంభమైంది. శుక్రవారం పళమేడులో మరో ప్రధాన పోటీ జరిగింది. ఈ రెండు పోటీల్లోనూ క్రీడాకారులు, ఎద్దులు ఎంతో ఉత్సాహంగా పాల్గొన్నాయి. విజేతలకు కార్లు, ట్రాక్టర్ల వంటి విలువైన బహుమతులు అందించారు.

ఈ సందర్భంగా స్టాలిన్ మాట్లాడుతూ, మధురైని శౌర్యానికి ప్రతీకగా అభివర్ణించారు. ప్రపంచ ప్రఖ్యాతి గాంచిన అలంగనల్లూరు జల్లికట్టు తమిళ ప్రజల స్ఫూర్తిని ప్రతిబింబిస్తుందన్నారు. తమ ద్రవిడ మోడల్ పాలనలో కలైంజర్ శతాబ్ది గ్రంథాలయం వంటివి తమిళ వారసత్వాన్ని, జ్ఞానాన్ని ప్రోత్సహించడంలో ప్రభుత్వ నిబద్ధతకు నిదర్శనాలని పేర్కొన్నారు. తాజా ప్రకటనలు క్రీడాకారులను మరింత ప్రోత్సహిస్తాయని, సంక్షేమంతో పాటు తమిళ సంప్రదాయాలు వర్ధిల్లడానికి తమ ప్రభుత్వం కృషి చేస్తుందని స్టాలిన్ తెలిపారు.