థాయ్‌లాండ్‌లో ఘోర రైలు ప్రమాదం.. రైలుపై కూలిన క్రేన్, 22 మంది మృతి

థాయ్‌లాండ్‌లో బుధవారం ఘోర రైలు ప్రమాదం జరిగింది. నిర్మాణంలో ఉన్న హైస్పీడ్ రైల్వే లైన్‌కు చెందిన భారీ క్రేన్ ఒకటి ప్రయాణికులతో వెళ్తున్న రైలుపై కూలిపోవడంతో 22 మంది ప్రాణాలు కోల్పోయారు. ఈ దుర్ఘటనలో మరో 30 మందికి పైగా తీవ్రంగా గాయపడ్డారు.

వివరాల్లోకి వెళ్తే, బ్యాంకాక్‌కు ఈశాన్యంగా సుమారు 230 కిలోమీటర్ల దూరంలోని నఖోన్ రచాసిమా ప్రావిన్స్‌లోని సిఖియో జిల్లాలో ఈ ప్రమాదం చోటుచేసుకుంది. స్థానిక కాలమానం ప్రకారం ఉదయం 9 గంటల సమయంలో, బ్యాంకాక్ నుంచి ఉబాన్ రచాథాని ప్రావిన్స్‌కు వెళ్తున్న స్పెషల్ ఎక్స్‌ప్రెస్ నెం.21 రైలుపై క్రేన్ కూలింది. ఈ రైలులో ప్రమాద సమయంలో 195 మంది ప్రయాణికులు, సిబ్బంది ఉన్నారు.

క్రేన్ బలంగా ఢీకొట్టిన ధాటికి రైలుకు చెందిన మూడు బోగీలు పట్టాలు తప్పాయి. వెంటనే మంటలు చెలరేగి దట్టమైన పొగలు కమ్ముకున్నాయని అధికారులు తెలిపారు. సమాచారం అందుకున్న వెంటనే సహాయక బృందాలు ఘటనా స్థలానికి చేరుకున్నాయి. హైడ్రాలిక్ కట్టర్ల సహాయంతో బోగీలలో చిక్కుకున్న ప్రయాణికులను బయటకు తీసి, క్షతగాత్రులను సమీపంలోని ఆసుపత్రులకు తరలించారు.

"ఈ ప్రమాదంలో 22 మంది మరణించగా, 30 మందికి పైగా గాయపడ్డారు" అని నఖోన్ రచాసిమా ప్రావిన్షియల్ పోలీస్ చీఫ్ థాచాపోన్ చిన్నవాంగ్ మీడియాకు ధ్రువీకరించారు. మృతుల సంఖ్యపై తొలుత భిన్నమైన నివేదికలు వెలువడినప్పటికీ, చివరకు పోలీసులు 22 మంది మరణించినట్లు స్పష్టం చేశారు.

థాయ్-చైనీస్ హై-స్పీడ్ రైల్వే ప్రాజెక్టు నిర్మాణ పనుల్లో భాగంగా ఈ క్రేన్‌ను ఉపయోగిస్తున్నారు. ఈ ఘటనపై థాయ్‌లాండ్ రవాణా శాఖ మంత్రి ఫిఫత్ రచాకిత్‌ప్రకార్న్ తీవ్ర దిగ్భ్రాంతి వ్యక్తం చేశారు. ప్రమాదానికి గల కచ్చితమైన కారణాలపై సమగ్ర దర్యాప్తు జరపాలని స్టేట్ రైల్వే ఆఫ్ థాయ్‌లాండ్‌ (SRT)ను ఆయన ఆదేశించారు.