దేశ ప్రజలకు ప్రధాని మోదీ మకర సంక్రాంతి శుభాకాంక్షలు

ప్రధానమంత్రి నరేంద్ర మోదీ బుధవారం దేశ ప్రజలకు మకర సంక్రాంతి పర్వదిన శుభాకాంక్షలు తెలిపారు. ఈ పండుగ అందరి జీవితాల్లో శ్రేయస్సు, విజయం తీసుకురావాలని ఆయన ఆకాంక్షించారు.

ఈ సందర్భంగా ప్రధాని మోదీ 'X' వేదికగా స్పందిస్తూ, "పవిత్రమైన మకర సంక్రాంతి సందర్భంగా దేశ ప్రజలందరికీ హృదయపూర్వక శుభాకాంక్షలు. భారతీయ సంస్కృతి, సంప్రదాయాల్లో భాగమైన నువ్వులు-బెల్లం తీపిదనంతో నిండిన ఈ దివ్యమైన పండుగ, ప్రతి ఒక్కరి జీవితంలో ఆనందం, శ్రేయస్సు, విజయాన్ని తీసుకురావాలి. సూర్య భగవానుడు మనందరినీ ఆశీర్వదించాలి" అని పేర్కొన్నారు.

మకర సంక్రాంతి, మాఘ్ బిహు, పొంగల్ వంటి పండుగలు భారతదేశపు పంట కోతల పండుగలని, ఇవి మన దేశ సంప్రదాయాల గొప్పతనాన్ని చాటి చెబుతాయని ఈ సందర్భంగా గుర్తుచేశారు. వ్యవసాయ సంస్కృతితో ముడిపడి ఉన్న ఈ పండుగలు రుతువుల మార్పుకు సూచికగా నిలుస్తాయని, ప్రకృతి, సాంస్కృతిక వైవిధ్యం, సామాజిక సామరస్యాన్ని ప్రతిబింబిస్తాయని తెలిపారు.

కేంద్ర మంత్రి జేపీ నడ్డా కూడా దేశ ప్రజలకు శుభాకాంక్షలు తెలిపారు. "ధర్మం, సేవ, దానధర్మాలతో ముడిపడిన ఈ పవిత్ర పండుగ సందర్భంగా అందరికీ నా హృదయపూర్వక శుభాకాంక్షలు. భారతీయ సంస్కృతి, సంప్రదాయాలను సుసంపన్నం చేసే ఈ పండుగ సమాజానికి సానుకూలత, సమానత్వం, అంకితభావాన్ని అందిస్తుంది. ఈ పర్వదినం అందరి జీవితాల్లో ఆరోగ్యం, శ్రేయస్సు, సౌభాగ్యం తీసుకురావాలని సూర్య భగవానుడిని ప్రార్థిస్తున్నాను" అని ఆయన అన్నారు.

విదేశాంగ మంత్రి ఎస్. జైశంకర్ స్పందిస్తూ, "మకర సంక్రాంతి, మాఘ్ బిహు, పొంగల్ సందర్భంగా హృదయపూర్వక శుభాకాంక్షలు. ఈ పండుగలు అందరికీ శ్రేయస్సు, శాంతి, సమృద్ధిని ప్రసాదించాలి" అని ఆకాంక్షించారు