డబ్ల్యూపీఎల్‌లో నందని శర్మ చరిత్ర.. హ్యాట్రిక్‌తో మెరిసిన అన్‌క్యాప్‌డ్ ప్లేయర్

ఉమెన్స్ ప్రీమియర్ లీగ్ (WPL) 2026లో ఢిల్లీ క్యాపిటల్స్ యువ పేసర్ నందని శర్మ సరికొత్త చరిత్ర సృష్టించింది. ఆదివారం డి.వై. పాటిల్ స్టేడియంలో గుజరాత్ జెయింట్స్‌తో జరిగిన మ్యాచ్‌లో హ్యాట్రిక్ సాధించడం ద్వారా ఈ ఘనత సాధించిన తొలి అన్‌క్యాప్‌డ్ (భారత జట్టుకు ప్రాతినిధ్యం వహించని) క్రీడాకారిణిగా రికార్డులకెక్కింది. గతంలో ఇస్సీ వాంగ్, దీప్తి శర్మ, గ్రేస్ హారిస్ మాత్రమే డబ్ల్యూపీఎల్‌లో హ్యాట్రిక్ సాధించగా, ఇప్పుడు నందని ఆ జాబితాలో చేరింది.

గుజరాత్ ఓపెనర్ సోఫీ డివైన్ 42 బంతుల్లోనే 95 పరుగులు చేసి చెలరేగుతున్న సమయంలో నందని తన అద్భుత బౌలింగ్‌తో మ్యాచ్‌ను మలుపు తిప్పింది. ముందుగా సోఫీ డివైన్‌ను అవుట్ చేసిన ఆమె ఆ తర్వాత ఇన్నింగ్స్ చివరి ఓవర్లో సంచలనం సృష్టించింది. 20వ ఓవర్ రెండో బంతికి కాశ్వి గౌతమ్‌ను అవుట్ చేసి, ఆ తర్వాతి మూడు బంతుల్లో కనికా అహూజా, రాజేశ్వరి గైక్వాడ్, రేణుకా ఠాకూర్‌లను పెవిలియన్ పంపి హ్యాట్రిక్ పూర్తి చేసింది. మొత్తంగా 4 ఓవర్లలో 33 పరుగులిచ్చి 5 వికెట్లు పడగొట్టి తన కెరీర్‌లో అత్యుత్తమ గణాంకాలను నమోదు చేసింది.

తొలి ఓవర్లో ఫోర్లు కొట్టినప్పుడు తన వ్యూహాన్ని మార్చుకుని వేరియేషన్స్‌తో వికెట్లు తీశానని నందని తెలిపింది. కెప్టెన్ జెమీమా రోడ్రిగ్స్, షెఫాలీ వర్మ తనపై ఉంచిన నమ్మకమే ఈ విజయాన్ని ఇచ్చిందని పేర్కొంది. కేవలం రెండు మ్యాచ్‌ల్లోనే 7 వికెట్లు సాధించిన నందని, ప్రస్తుతం అత్యధిక వికెట్లు తీసిన బౌలర్‌గా 'పర్పుల్ క్యాప్'ను దక్కించుకుంది. చండీగఢ్‌కు చెందిన ఈ 24 ఏళ్ల పేసర్ ప్రతిభపై సర్వత్రా ప్రశంసలు వ్యక్తమవుతున్నాయి.