మదురోలా పుతిన్‌ను కూడా పట్టుకుంటారా?.. జెలెన్‌స్కీ వ్యాఖ్యలపై ట్రంప్ ఏమన్నారంటే..!

వెనెజువెలా మాజీ అధ్యక్షుడు నికోలస్ మదురోను అమెరికా బలగాలు అనూహ్య రీతిలో అరెస్ట్ చేయడం అంతర్జాతీయ రాజకీయాల్లో ప్రకంపనలు సృష్టిస్తోంది. కారకాస్‌లోని ఆయన నివాసంపై గత వారం మెరుపుదాడి చేసి, మదురోను పట్టుకుని న్యూయార్క్ జైలుకు తరలించారు. ఈ ఘటన అమెరికా-రష్యా సంబంధాలపై కొత్త చర్చకు దారితీసింది. మదురో అరెస్ట్‌ను ఉద్దేశించి, "ఒక నియంతతో ఇలాగే వ్యవహరించాలి, తదుపరి ఏం చేయాలో అమెరికాకు తెలుసు" అంటూ ఉక్రెయిన్ అధ్యక్షుడు వొలొదిమిర్ జెలెన్‌స్కీ.. రష్యా అధ్యక్షుడు వ్లాదిమిర్ పుతిన్‌ను ఉద్దేశించి పరోక్ష వ్యాఖ్యలు చేశారు.

అయితే, జెలెన్‌స్కీ అభిప్రాయంతో అమెరికా అధ్యక్షుడు డొనాల్డ్ ట్రంప్ విభేదించారు. పుతిన్‌ను అరెస్ట్ చేయాల్సిన అవసరం రాదని స్పష్టం చేశారు. "పుతిన్‌ విషయంలో నేను చాలా నిరాశకు గురయ్యాను. కానీ, ఆయనతో మాకు ఎప్పుడూ మంచి సంబంధాలే ఉన్నాయి. ఆయన్ను బలవంతంగా పట్టుకోవాల్సిన అవసరం వస్తుందని నేను అనుకోవడం లేదు" అని ట్రంప్ వ్యాఖ్యానించారు. 

ఉక్రెయిన్-రష్యా యుద్ధాన్ని ఆపలేకపోయినందుకు విచారం వ్యక్తం చేస్తూ, తాను ఇప్పటికే 8 యుద్ధాలను పరిష్కరించానని గుర్తుచేశారు. "గత నెలలోనే 31,000 మంది చనిపోయారు. వారిలో చాలామంది రష్యా సైనికులే. రష్యా ఆర్థిక వ్యవస్థ కూడా బలహీనపడింది. ఈ సమస్యను త్వరలోనే పరిష్కరిస్తామని భావిస్తున్నాను" అని ట్రంప్ తెలిపారు.

గత వారం అర్ధరాత్రి కారకాస్‌ నగరంపై అమెరికా యుద్ధ విమానాలు ఆకస్మికంగా వైమానిక దాడులు జరిపాయి. ఆ వెంటనే రంగంలోకి దిగిన అమెరికా అత్యంత రహస్య దళం 'డెల్టా ఫోర్స్', నిద్రిస్తున్న మదురోను అదుపులోకి తీసుకుంది. అక్కడి నుంచి ఆయన్ను యూఎస్ఎస్ జిమా అనే భారీ యుద్ధ నౌక ద్వారా న్యూయార్క్‌కు తరలించారు. ప్రస్తుతం ఉపాధ్యక్షురాలు డెల్సీ రోడ్రిగ్జ్ వెనెజువెలా అధ్యక్ష బాధ్యతలు చేపట్టగా, ఆ దేశ చమురు ఎగుమతులపై పట్టు సాధించేందుకు ట్రంప్ యంత్రాంగం సిద్ధమవుతోంది.