Bobby Mukkamala: అమెరికా డైట్ పాలసీలో కీలక మార్పులు.. సంపూర్ణ ఆహారానికే పెద్దపీట

అమెరికా ప్రజల ఆరోగ్యాన్ని దృష్టిలో ఉంచుకుని ట్రంప్ ప్రభుత్వం నూతన ఆహార మార్గదర్శకాలను విడుదల చేసింది. సంపూర్ణ, సహజసిద్ధమైన ఆహారానికే (whole foods) పెద్దపీట వేయాలని, అత్యధికంగా ప్రాసెస్ చేసిన ఉత్పత్తులను గణనీయంగా తగ్గించాలని ఈ గైడ్‌లైన్స్‌లో స్పష్టం చేసింది. దేశ పౌష్టికాహార విధానంలో ఇది ఒక కీలకమైన మార్పుగా విశ్లేషకులు భావిస్తున్నారు.

ఈ కొత్త నిబంధనల ప్రకారం, ప్రజలు తమ ఆహారంలో పండ్లు, కూరగాయలు, తృణధాన్యాలు, ఆరోగ్యకరమైన కొవ్వులు ఉండే మాంసం, సీఫుడ్, గుడ్లు, నట్స్, గింజలు, ఆలివ్స్, అవకాడో వంటి వాటిని ఎక్కువగా చేర్చుకోవాలని సూచించారు. అదే సమయంలో, అదనపు చక్కెరలు, రిఫైన్డ్ కార్బోహైడ్రేట్లు, చక్కెర పానీయాలు, ఉప్పు ఎక్కువగా ఉండే ప్రాసెస్డ్ ఫుడ్ వాడకాన్ని పరిమితం చేయాలని పేర్కొన్నారు.

ఈ మార్గదర్శకాలను అమెరికన్ మెడికల్ అసోసియేషన్ (AMA), అమెరికన్ అకాడమీ ఆఫ్ పీడియాట్రిక్స్ వంటి ప్రముఖ వైద్య సంస్థలతో పాటు, ఆరోగ్య కార్యకర్తలు, రైతు సంఘాలు కూడా స్వాగతించాయి. "ఆహారమే ఔషధం అనే భావనను ఈ మార్గదర్శకాలు బలపరుస్తున్నాయి. గుండె జబ్బులు, మధుమేహం, ఊబకాయం వంటి దీర్ఘకాలిక వ్యాధులకు కారణమవుతున్న ప్రాసెస్డ్ ఫుడ్‌ను తగ్గించాలని చెప్పడం సరైన చర్య" అని ఏఎంఏ అధ్యక్షుడు బాబీ ముక్కామల అన్నారు. ఈ పదవిని చేపట్టిన తొలి భారతీయ అమెరికన్‌గా ఆయన గుర్తింపు పొందారు.

అమెరికా ఆరోగ్య, వ్యవసాయ శాఖలు సంయుక్తంగా ప్రతి ఐదేళ్లకు ఒకసారి ఈ మార్గదర్శకాలను జారీ చేస్తాయి. దేశవ్యాప్తంగా ప్రభుత్వ పోషకాహార కార్యక్రమాలు, పాఠశాలల్లో భోజన పథకాలు వీటి ఆధారంగానే రూపొందిస్తారు.