సిద్ధూ పూర్తికాలం సీఎంగా ఉంటారన్న డీకే... అధిష్ఠానం చూసుకుంటుందన్న సిద్ధరామయ్య

కర్ణాటక రాజకీయాల్లో ముఖ్యమంత్రి మార్పు అంశం మరోసారి తెరపైకి వచ్చింది. తాను పూర్తికాలం సీఎంగా కొనసాగుతానో? లేదో? పార్టీ అధిష్ఠానం నిర్ణయిస్తుందని సీఎం సిద్ధరామయ్య స్వయంగా చెప్పారు. ఇవాళ‌ మైసూరులో మీడియాతో మాట్లాడుతూ ఆయన ఈ కీలక వ్యాఖ్యలు చేశారు. 

"నా పదవీకాలం పూర్తిచేస్తానా? లేదా? అన్నది అధిష్ఠానం నిర్ణయంపై ఆధారపడి ఉంటుంది. అధిష్ఠానంపై నాకు పూర్తి నమ్మకం ఉంది" అని ఆయన పేర్కొన్నారు. గతంలో తాను ఐదేళ్లు సీఎంగా ఉంటానని ధీమా వ్యక్తం చేసిన సిద్ధరామయ్య, ఇప్పుడు ఇలా మాట్లాడటం ప్రాధాన్యత సంతరించుకుంది.

అయితే, ఈరోజే బెంగళూరులో మాట్లాడిన డిప్యూటీ సీఎం డీకే శివకుమార్ కూడా ఆసక్తికరంగా స్పందించారు. సిద్ధరామయ్య తన ఐదేళ్ల పదవీకాలాన్ని పూర్తి చేసుకోవాలని తాను కోరుకుంటున్నానని తెలిపారు. "ఆయనకు అంతా మంచే జరగాలి. మా మధ్య ఎలాంటి గందరగోళం లేదు. అదంతా మీడియా సృష్టే. ఆయన మరిన్ని విజయాలు సాధించాలి" అని శివకుమార్ ఆకాంక్షించారు.

ఇటీవల బళ్లారిలో జరిగిన ఘర్షణల గురించి ప్రస్తావిస్తూ.. రాష్ట్రంలో శాంతిభద్రతలకు బీజేపీ భంగం కలిగిస్తోందని ఆరోపించారు. మంత్రి జమీర్ అహ్మద్ ఖాన్ రూ. 25 లక్షల పరిహారం నగదు రూపంలో ఇవ్వడంపై వచ్చిన ఆరోపణల గురించి ఆయనతో మాట్లాడతానని చెప్పారు. 

సోనియా గాంధీ ఆసుపత్రిలో చేరడంపై స్పందిస్తూ, ఆమె త్వరగా కోలుకోవాలని, దేశానికి, పార్టీకి ఆమె మార్గనిర్దేశం ఎంతో అవసరమని శివకుమార్ ఆకాంక్షించారు.