సంక్రాంతి బరిలో చిరు.. సెన్సార్ పూర్తి చేసుకున్న ‘మన శంకర వరప్రసాద్ గారు’

సంక్రాంతి పండుగను లక్ష్యంగా చేసుకుని బాక్సాఫీస్ వద్ద సందడి చేసేందుకు మెగాస్టార్ చిరంజీవి సిద్ధమయ్యారు. ఆయన కథానాయకుడిగా, సక్సెస్‌ఫుల్ డైరెక్టర్ అనిల్ రావిపూడి దర్శకత్వంలో తెరకెక్కిన ‘మన శంకర వరప్రసాద్ గారు’ చిత్రం తాజాగా సెన్సార్ కార్యక్రమాలను పూర్తి చేసుకుంది. ఈ సినిమాకు సెన్సార్ బోర్డు ఎలాంటి కోతలు లేకుండా క్లీన్ యూ/ఏ (U/A) సర్టిఫికెట్ జారీ చేసింది. ఈ నెల‌ 12న ప్రపంచవ్యాప్తంగా ఈ చిత్రాన్ని విడుదల చేసేందుకు నిర్మాతలు సన్నాహాలు చేస్తున్నారు.

సెన్సార్ పూర్తవడంతో సినిమాపై పాజిటివ్ బజ్ మొదలైంది. పూర్తిస్థాయి వినోదాత్మక చిత్రంగా, కుటుంబమంతా కలిసి చూసేలా ఉందని సెన్సార్ వర్గాల నుంచి సమాచారం అందుతోంది. దర్శకుడు అనిల్ రావిపూడి తన మార్క్ క్లీన్ కామెడీతో, ఎక్కడా డబుల్ మీనింగ్ సంభాషణలు లేకుండా సినిమాను తీర్చిదిద్దినట్లు తెలుస్తోంది. ఇక, సినిమా నిడివిని మేకర్స్ 2 గంటల 42 నిమిషాలుగా లాక్ చేశారు. చిరంజీవి కామెడీ టైమింగ్, మాస్ ఎలిమెంట్స్‌తో ఈ రన్‌టైమ్ ప్రేక్షకులను ఆద్యంతం అలరిస్తుందని చిత్రబృందం ధీమా వ్యక్తం చేస్తోంది.

ఈ సినిమాలో చిరంజీవి సరసన నయనతార హీరోయిన్‌గా నటిస్తుండగా, విక్టరీ వెంకటేశ్‌ కీలకమైన అతిథి పాత్రలో కనిపించనున్నారు. ఇప్పటికే చిరంజీవి, వెంకటేశ్‌లపై చిత్రీకరించిన పార్టీ సాంగ్ సోషల్ మీడియాలో ట్రెండ్ అవుతూ సినిమాపై అంచనాలను పెంచింది. భీమ్స్ సిసిరోలియో అందించిన సంగీతం కూడా మాస్ ఆడియెన్స్‌ను ఆకట్టుకుంది.

‘వాల్తేరు వీరయ్య’ వంటి బ్లాక్‌బస్టర్ తర్వాత చిరంజీవి నుంచి వస్తున్న పక్కా కమర్షియల్ ఎంటర్‌టైనర్ కావడంతో మెగా అభిమానులు భారీ అంచనాలతో ఎదురుచూస్తున్నారు. సాహు గారపాటి, సుష్మిత కొణిదెల నిర్మించిన ఈ చిత్రం, పండుగ సీజన్‌లో బాక్సాఫీస్ వద్ద విజేతగా నిలుస్తుందని ట్రేడ్ వర్గాలు అంచనా వేస్తున్నాయి.