'మూన్‌వాక్' టీమ్ తో బర్త్ డే సెలబ్రేట్ చేసుకున్న ఏఆర్ రెహమాన్... స్టెప్పులేయించిన ప్రభుదేవా

ప్రభుదేవా హీరోగా, సంగీత మాంత్రికుడు ఏఆర్ రెహమాన్ కీలక పాత్రలో నటిస్తున్న 'మూన్‌వాక్' సినిమా ఆడియో విడుదల వేడుకలో ఆసక్తికర దృశ్యాలు కనిపించాయి. ఈ కార్యక్రమం రెహమాన్ పుట్టినరోజు వేడుకలకు, ఆయన లైవ్ మ్యూజికల్ నైట్‌కు వేదికగా నిలిచింది. ఈ చిత్రంలోని ఐదు పాటలను రెహమాన్ స్వరపరచడమే కాకుండా స్వయంగా పాడటం, నటుడిగా కూడా కనిపించనుండటం విశేషం.

ఈవెంట్‌లో అసలు సందడి ఏఆర్ రెహమాన్ స్టేజ్‌పైకి వచ్చినప్పుడు మొదలైంది. సినిమాలోని ఐదు పాటలను ఆయన లైవ్‌లో పాడటంతో అభిమానులు ఉత్సాహంతో ఊగిపోయారు. ఇక 'ఇండియన్ మైఖేల్ జాక్సన్'గా పేరుగాంచిన ప్రభుదేవా, రెహమాన్‌కు నీరాజనాలు అర్పిస్తూ 10 నిమిషాల పాటు అద్భుతమైన డ్యాన్స్ ప్రదర్శన ఇచ్చారు. సహనటులు యోగిబాబు, అజు వర్గీస్, అర్జున్ అశోకన్‌లతో కలిసి ఆయన చేసిన డ్యాన్స్ ప్రత్యేక ఆకర్షణగా నిలిచింది.

కార్యక్రమం చివర్లో ప్రభుదేవా... రెహమాన్‌ను మళ్లీ స్టేజ్‌పైకి తీసుకొచ్చి, ఐకానిక్ 'ముక్కాలా' పాటకు ఆయనతో కలిసి స్టెప్పులేయించారు. అనంతరం 10,000 మంది అభిమానుల సమక్షంలో చిత్ర యూనిట్‌తో కలిసి రెహమాన్ బర్త్‌డే కేక్ కట్ చేశారు.

ఈ సినిమాలో తాను 16 విభిన్న పాత్రలు పోషిస్తున్నానని, తనది కథను ముందుకు నడిపించే కీలకమైన క్యారెక్టర్ నటుడు యోగిబాబు తెలిపారు. ఈ ప్రాజెక్ట్‌లో భాగమైనందుకు నటులు అజు వర్గీస్, అర్జున్ అశోకన్ సంతోషం వ్యక్తం చేశారు. సినిమా ప్రేక్షకులకు గొప్ప ఆనందాన్ని పంచుతుందని దర్శకుడు మనోజ్ ఎన్ఎస్ విశ్వాసం వ్యక్తం చేశారు. ఈ కార్యక్రమానికి రాఘవ లారెన్స్, నిర్మాత కలైపులి ఎస్. థాను వంటి పలువురు ప్రముఖులు హాజరయ్యారు. పూర్తిస్థాయి కామెడీ చిత్రంగా తెరకెక్కుతున్న 'మూన్‌వాక్' ఈ ఏడాది మేలో ప్రేక్షకుల ముందుకు రానుంది.