న్యూ ఇయర్-2026: బాండీ బాధితులకు నివాళి.. సిడ్నీ హార్బర్ పై కళ్లు చెదిరేలా బాణసంచా వెలుగులు

ఉగ్రవాద భయాలను పక్కనపెట్టి, ఆస్ట్రేలియా ప్రజలు 2026 నూతన సంవత్సరానికి ఘనంగా స్వాగతం పలికారు. దేశవ్యాప్తంగా జరిగిన వేడుకల్లో ఆనందోత్సాహాలతో పాటు, ఇటీవల బాండీ బీచ్‌లో జరిగిన ఉగ్రదాడి బాధితులకు సంఘీభావం తెలపడం ప్రధాన ఆకర్షణగా నిలిచింది. సిడ్నీ హార్బర్ బ్రిడ్జి సాక్షిగా లక్షలాది మంది ప్రజలు శాంతి, ఐక్యతలకు నిదర్శనంగా నిలిచారు.

బుధవారం రాత్రి సిడ్నీలో 2026 వేడుకలకు ముందు ఒక భావోద్వేగ ఘట్టం చోటుచేసుకుంది. రాత్రి 11 గంటల సమయంలో (స్థానిక కాలమానం ప్రకారం) అక్కడికి చేరిన ప్రజలంతా ఒక్క నిమిషం పాటు మౌనం పాటించారు. తమ ఫోన్ టార్చ్ లైట్లను ఆకాశం వైపు చూపిస్తూ బాండీ బాధితులకు నివాళి అర్పించారు. ఇదే సమయంలో హార్బర్ బ్రిడ్జి పిల్లర్లపై 'శాంతి', 'ఐక్యత' అనే సందేశాలతో పాటు, మెనోరా (యూదుల సంప్రదాయ దీప స్తంభం) మరియు పావురాల చిత్రాలను ప్రదర్శించారు. డిసెంబర్ 14న బాండీ బీచ్‌లో జరిగిన ఉగ్రదాడిలో 15 మంది మరణించగా, 41 మంది గాయపడిన విషయం తెలిసిందే.

ఈ విషాద ఘటన నేపథ్యంలో నగరంలో భద్రతా ఆందోళనలు ఉన్నప్పటికీ, ప్రజలు భయాన్ని వీడి భారీ సంఖ్యలో వేడుకల్లో పాల్గొన్నారు. పోలీసులు కట్టుదిట్టమైన భద్రతను ఏర్పాటు చేశారు. వేలాది మంది సాయుధ పోలీసులు పహారా కాశారు. ఈ సందర్భంగా ఆస్ట్రేలియా ప్రధాని ఆంథోనీ ఆల్బనీస్ మాట్లాడుతూ.. "బాండీ ఘటన మనకు ఆస్ట్రేలియన్ స్పిరిట్‌ను, ధైర్యాన్ని, కరుణను మరోసారి గుర్తుచేసింది" అని వ్యాఖ్యానించారు. ప్రజలు ఒకరికొకరు తోడుగా నిలబడాలని పిలుపునిచ్చారు.

పర్యాటకులు సైతం పోలీసుల భద్రత నడుమ తాము సురక్షితంగా ఉన్నామని, ఉత్సాహంగా వేడుకలు జరుపుకుంటున్నామని తెలిపారు. ఆ తర్వాత అర్ధరాత్రి జరిగిన బాణసంచా ప్రదర్శనతో సిడ్నీ ఆకాశం జిగేలుమన్నది. కేవలం సిడ్నీలోనే కాకుండా మెల్బోర్న్, పెర్త్, బ్రిస్బేన్ తదితర నగరాల్లోనూ లక్షలాది మంది ప్రజలు న్యూ ఇయర్ వేడుకల్లో ఉత్సాహంగా పాల్గొన్నారు. మెల్బోర్న్‌లో సుమారు 5 లక్షల మంది ప్రజలు అర్ధరాత్రి జరిగిన లేజర్ షో, బాణసంచా వెలుగులను వీక్షించారు.