మలింగకు కీలక బాధ్యతలు అప్పగించిన శ్రీలంక క్రికెట్ బోర్డు

2026 టీ20 ప్రపంచకప్‌నకు సన్నాహాల్లో భాగంగా శ్రీలంక క్రికెట్ బోర్డు కీలక నిర్ణయం తీసుకుంది. పేస్ దిగ్గజం, యార్కర్ స్పెషలిస్ట్ లసిత్ మలింగను జాతీయ జట్టుకు 'ఫాస్ట్ బౌలింగ్ సలహాదారు'గా నియమించింది. ఈ మెగా టోర్నీకి భారత్‌తో పాటు శ్రీలంక సంయుక్తంగా ఆతిథ్యం ఇస్తున్న నేపథ్యంలో, తమ బౌలింగ్ దళాన్ని పటిష్టం చేసేందుకు బోర్డు ఈ నిర్ణయం తీసుకుంది.

మలింగ నియామకం స్వల్పకాలిక ప్రాతిపదికన జరిగింది. దాదాపు నెల రోజుల పాటు మలింగ ఈ బాధ్యతల్లో కొనసాగుతాడని ఎస్‌ఎల్‌సీ మంగళవారం ఒక అధికారిక ప్రకటనలో తెలిపింది. ఈ సమయంలో మలింగ తన అపార అనుభవంతో జాతీయ ఫాస్ట్ బౌలర్లకు మెరుగులు దిద్దనున్నాడు. ముఖ్యంగా టీ20 ఫార్మాట్‌లో అత్యంత కీలకమైన 'డెత్ బౌలింగ్' (చివరి ఓవర్లు) వేయడంలో పేసర్లకు ప్రత్యేక శిక్షణ ఇవ్వనున్నాడు.

అంతర్జాతీయ క్రికెట్‌లో మలింగకు ఘనమైన రికార్డు ఉంది. 30 టెస్టులు, 226 వన్డేలు, 84 టీ20 మ్యాచ్‌లు ఆడిన ఈ వెర్సటైల్ పేసర్.. ఆయా ఫార్మాట్లలో వరుసగా 101, 338, 107 వికెట్లు పడగొట్టాడు. 2014లో శ్రీలంక టీ20 ప్రపంచకప్ గెలవడంలో మలింగ కీలక పాత్ర పోషించాడు. ఐపీఎల్‌లో ముంబై ఇండియన్స్ సహా ప్రపంచవ్యాప్తంగా అనేక లీగ్‌లలో ఆడిన అనుభవం అతడి సొంతం.

2026 ఐసీసీ పురుషుల టీ20 ప్రపంచకప్ ఫిబ్రవరి 7న ప్రారంభం కానుంది. కొలంబోలోని ఎస్‌ఎస్‌సీ మైదానంలో తొలి మ్యాచ్ జరగనుంది. స్వదేశంలో జరుగుతున్న ఈ మెగా టోర్నీ కోసం శ్రీలంక జట్టును సన్నద్ధం చేయడంలో మలింగ అనుభవం ఎంతగానో ఉపయోగపడుతుందని బోర్డు ఆశిస్తోంది.