Shaheen Afridi: టీ20 ప్రపంచకప్‌కు ముందు పాక్‌కు గట్టి ఎదురుదెబ్బ.. స్టార్ పేసర్ షాహీన్ అఫ్రిదికి గాయం

టీ20 ప్రపంచకప్‌కు ముందు పాకిస్థాన్ క్రికెట్ జట్టుకు గట్టి ఎదురుదెబ్బ తగిలింది. ఆ జట్టు స్టార్ పేస్ బౌలర్ షహీన్ షా అఫ్రిది మోకాలి గాయంతో మైదానాన్ని వీడాడు. ఆస్ట్రేలియాలో జరుగుతున్న బిగ్‌బాష్ లీగ్ (BBL)లో ఈ సంఘటన చోటుచేసుకుంది. ఈ పరిణామం పాకిస్థాన్ అభిమానుల్లో తీవ్ర ఆందోళన కలిగిస్తోంది.

బీబీఎల్‌లో బ్రిస్బేన్ హీట్ జట్టుకు ప్రాతినిధ్యం వహిస్తున్న షహీన్ శనివారం అడిలైడ్ స్ట్రైకర్స్‌తో జరిగిన మ్యాచ్‌లో గాయపడ్డాడు. అడిలైడ్ ఇన్నింగ్స్ 14వ ఓవర్‌లో బౌండరీ లైన్ వద్ద ఫీల్డింగ్ చేస్తూ బంతిని ఆపడానికి వేగంగా పరిగెత్తాడు. ఈ క్రమంలో అతడి కుడి మోకాలికి గాయమైంది. నొప్పితో తీవ్రంగా ఇబ్బంది పడిన అతడు వెంటనే మైదానాన్ని వీడాడు.

ఈ మ్యాచ్‌లో గాయపడటానికి ముందు షహీన్ మూడు ఓవర్లు బౌలింగ్ చేసి 26 పరుగులు ఇచ్చాడు, కానీ వికెట్లేమీ తీసుకోలేకపోయాడు. అతడు మైదానం వీడినా ఈ మ్యాచ్‌లో బ్రిస్బేన్ హీట్ జట్టు 7 పరుగుల తేడాతో విజయం సాధించింది.

ఇంకో ఆరు వారాల్లో టీ20 ప్రపంచకప్ ప్రారంభం కానున్న నేపథ్యంలో షహీన్ గాయం పాకిస్థాన్ శిబిరంలో కలవరం రేపుతోంది. ప్రస్తుతం అతడిని వైద్య బృందం పర్యవేక్షిస్తోందని, గాయం తీవ్రతపై 24 నుంచి 48 గంటల్లో పూర్తి స్పష్టత వస్తుందని జట్టు వర్గాలు తెలిపాయి. బీబీఎల్ సీజన్‌లో షహీన్ పేలవ ఫామ్‌తో ఇబ్బంది పడుతుండగా, ఇప్పుడు గాయం రూపంలో మరో సమస్య ఎదురైంది.