నా గ్లోయింగ్ స్కిన్ సీక్రెట్ అదే.. అసలు విషయం చెప్పిన నోరా ఫతేహి

ప్రముఖ డ్యాన్సర్, నటి నోరా ఫతేహి తన అందం, కాంతివంతమైన చర్మం వెనుక ఉన్న రహస్యాన్ని సరదాగా వెల్లడించారు. గతంలో ఆమె కపిల్ శర్మ షోలో పాల్గొన్నప్పటి వీడియో ఒకటి ప్రస్తుతం సోషల్ మీడియాలో మళ్లీ వైరల్ అవుతోంది.

ఆ వీడియోలో కపిల్ శర్మ, "నోరా, మీ స్కిన్ ఇంత గ్లోగా ఉండటానికి ఏం తింటారు? మీ రొటీన్ ఏంటి?" అని ప్రశ్నించారు. దీనికి నోరా నవ్వుతూ, "నాదొక మంచి రొటీన్ ఉంది. నేను పాస్తా, అన్నం, పప్పు, రోటీ, ఉడికించిన బంగాళాదుంపలు తింటాను. నాకు కారు లేదు, ఆటో రిక్షాలోనే ప్రయాణిస్తాను" అని చమత్కరించారు.

తన అద్భుతమైన డ్యాన్స్ నైపుణ్యాలతో నోరా ఫతేహి భారత చిత్ర పరిశ్రమలో ప్రత్యేక స్థానం సంపాదించుకున్నారు. ముఖ్యంగా బాలీవుడ్‌లో స్పెషల్ సాంగ్స్‌తో ఆమెకు దేశవ్యాప్తంగా గుర్తింపు లభించింది. కేవలం డ్యాన్సర్‌గానే కాకుండా 'బాట్లా హౌస్', 'స్ట్రీట్ డ్యాన్సర్ 3D', 'మడ్‌గావ్ ఎక్స్‌ప్రెస్' వంటి చిత్రాలతో నటిగానూ తనను తాను నిరూపించుకున్నారు. పలు డ్యాన్స్ రియాలిటీ షోలకు జడ్జిగా కూడా వ్యవహరించారు.

ప్రస్తుతం ఆమె రాఘవ లారెన్స్ దర్శకత్వంలో తెరకెక్కుతున్న 'కాంచన 4' సినిమాలో నటిస్తున్నారు. ఈ సినిమాతో నోరా దక్షిణాది ప్రేక్షకులకు మరింత చేరువ కానున్నారు.