టాంజానియా దేశంలో తెలంగాణ వ్యక్తి హఠాన్మరణం

ఉపాధి కోసం విదేశాలకు వెళ్లిన ఓ వ్యక్తి గుండెపోటుతో అకాల మరణం చెందడంతో నల్గొండ జిల్లాలో విషాదం నెలకొంది. మునుగోడు మండలం పలివెల గ్రామానికి చెందిన బడుగు రాజు (38) ఆఫ్రికా దేశమైన టాంజానియాలో గుండెపోటుతో మృతి చెందాడు. ఈ విషయాన్ని అతడి సహోద్యోగులు కుటుంబ సభ్యులకు ఫోన్ ద్వారా తెలియజేశారు.

వివరాల్లోకి వెళితే, బడుగు రాజు టాంజానియా రాజధాని దారుస్సలాంలో జియాలజిస్ట్‌గా పనిచేస్తున్నాడు. విధి నిర్వహణలో ఉండగానే అతడు గుండెపోటుకు గురై మరణించినట్లు సమాచారం. రాజు మరణవార్త తెలియడంతో పలివెల గ్రామంలో, ఆయన కుటుంబంలో విషాద ఛాయలు అలుముకున్నాయి.

ఈ ఘటనపై స్పందించిన స్థానిక ఎమ్మెల్యే కోమటిరెడ్డి రాజగోపాల్ రెడ్డి, మంత్రి శ్రీధర్ బాబు... రాజు మృతదేహాన్ని స్వగ్రామానికి రప్పించేందుకు చర్యలు చేపట్టారు. ఈ మేరకు వారు టాంజానియాలోని భారత రాయబార కార్యాలయ అధికారులతో సంప్రదింపులు జరుపుతున్నారు. వీలైనంత త్వరగా మృతదేహాన్ని స్వస్థలానికి తీసుకువచ్చేందుకు ప్రయత్నిస్తున్నామని వారు తెలిపారు.