భారత్-దక్షిణాఫ్రికా నాలుగో టీ20కి పొగమంచు దెబ్బ... టాస్ ఆలస్యం

భారత్, దక్షిణాఫ్రికా మధ్య లక్నోలో జరగాల్సిన నాలుగో టీ20 మ్యాచ్‌కు దట్టమైన పొగమంచు అడ్డంకిగా మారింది. నగరంలోని భారతరత్న శ్రీ అటల్ బిహారీ వాజ్‌పేయి ఏకానా క్రికెట్ స్టేడియం పరిసరాలను పొగమంచు పూర్తిగా కప్పేయడంతో, టాస్‌ ఆలస్యమైంది. సాయంత్రం 6:50 గంటలకు మైదానాన్ని పరిశీలించిన అంపైర్లు 8.30 గంటలకు మరోసారి పరిశీలించి తదుపరి నిర్ణయం తీసుకోనున్నారు. ఈ మేరకు బీసీసీఐ తమ 'ఎక్స్' ఖాతాలో వెల్లడించింది.

వాతావరణ పరిస్థితుల దృష్ట్యా, ఉత్తరప్రదేశ్‌లోని పలు జిల్లాల్లో 'అతి దట్టమైన పొగమంచు' కురిసే అవకాశం ఉందని భారత వాతావరణ శాఖ (IMD) ఇప్పటికే ఆరెంజ్ అలర్ట్ జారీ చేసింది. లక్నోలో పొగమంచు తీవ్రత ఎంతగా ఉందంటే, స్టేడియంలోని ప్రేక్షకులు ఎదురుగా ఉన్న స్టాండ్స్‌ను కూడా స్పష్టంగా చూడలేకపోయారు. సమయం గడిచేకొద్దీ పొగ మరింత పెరిగే అవకాశం ఉన్నందున, మ్యాచ్ నిర్వహణపై అనుమానాలు వ్యక్తమవుతున్నాయి. డిసెంబర్ నెలలో లక్నోలో ఒక టీ20 అంతర్జాతీయ మ్యాచ్ జరగడం ఇదే తొలిసారి.

ఇదిలా ఉండగా, భారత జట్టుకు మిశ్రమ ఫలితాలు ఎదురయ్యాయి. వ్యక్తిగత కారణాలతో గత మ్యాచ్‌కు దూరమైన స్టార్ పేసర్ జస్ప్రీత్ బుమ్రా తిరిగి జట్టుతో చేరి వార్మప్‌లో పాల్గొన్నాడు. అయితే, వైస్ కెప్టెన్ శుభ్‌మన్ గిల్ కాలి బొటనవేలి గాయం కారణంగా ఈ మ్యాచ్‌కు దూరమైనట్లు తెలుస్తోంది. అతని స్థానంలో సంజూ శాంసన్‌కు తుది జట్టులో అవకాశం లభించవచ్చు.

ఐదు మ్యాచ్‌ల ఈ సిరీస్‌లో భారత్ ప్రస్తుతం 2-1 ఆధిక్యంలో ఉంది. ఈ మ్యాచ్‌లో గెలిచి సిరీస్‌ను కైవసం చేసుకోవాలని టీమిండియా భావిస్తోంది. అయితే, అందుకు వాతావరణం సహకరించి, పొగమంచు ప్రభావం తగ్గితేనే ఆట సాధ్యమవుతుంది.