రఘురామ కస్టడీ కేసు: 5 గంటల విచారణలో మౌనం వహించిన సునీల్ కుమార్

వైసీపీ ప్రభుత్వ హయాంలో సంచలనం సృష్టించిన నరసాపురం మాజీ ఎంపీ రఘురామకృష్ణరాజు కస్టడీ హింస కేసులో విచారణ వేగవంతమైంది. ఈ కేసులో ప్రధాన నిందితుడిగా ఉన్న సీఐడీ మాజీ చీఫ్, ఐపీఎస్ అధికారి పీవీ సునీల్ కుమార్‌ను సోమవారం దర్యాప్తు అధికారులు సుదీర్ఘంగా విచారించారు. గుంటూరులోని సీసీఎస్ కార్యాలయంలో సుమారు 5 గంటల పాటు ఈ విచారణ కొనసాగింది.

విజయనగరం ఎస్పీ దామోదర్ నేతృత్వంలోని దర్యాప్తు బృందం, ఇద్దరు వీఆర్వోల సమక్షంలో ఈ విచారణ ప్రక్రియను పూర్తిగా వీడియో రికార్డ్ చేసింది. "రఘురామకృష్ణరాజును కస్టడీలో కొట్టాలని మీకు అప్పటి ప్రభుత్వ పెద్దల నుంచి ఏమైనా ఆదేశాలు వచ్చాయా? ముసుగులు ధరించి దాడి చేసిన వ్యక్తులు ఎవరు? ఈ మొత్తం వ్యవహారంలో మీ పాత్ర ఏమిటి?" వంటి కీలక ప్రశ్నలను సునీల్ కుమార్‌పై సంధించినట్లు విశ్వసనీయ వర్గాల సమాచారం.

అయితే, చాలా ప్రశ్నలకు సునీల్ కుమార్ పొడిపొడిగా, ముక్తసరిగా సమాధానాలు ఇస్తూ దాటవేసినట్లు తెలిసింది. కొన్ని ప్రశ్నలకు 'నాకు తెలియదు' అని బదులివ్వగా, మరికొన్నింటికి 'రికార్డుల్లో సమాధానాలు ఉంటాయి' అని చెప్పినట్లు సమాచారం. ఆయన విచారణకు పూర్తిస్థాయిలో సహకరించలేదని భావించిన అధికారులు, మరోసారి విచారణకు హాజరు కావాలని నోటీసులు జారీ చేసేందుకు సిద్ధమవుతున్నారు.