దేశంలో అత్యంత ఫిట్టెస్ట్ సీఎం రేవంత్ రెడ్డి: సోదరుడు కొండల్ రెడ్డి

తెలంగాణ ముఖ్యమంత్రి రేవంత్ రెడ్డి దేశంలోనే అత్యంత ఫిట్‌నెస్ ఉన్న ముఖ్యమంత్రి అని ఆయన సోదరుడు అనుముల కొండల్ రెడ్డి ప్రశంసించారు. ఫుట్‌బాల్ దిగ్గజం లియోనెల్ మెస్సీతో కలిసి సీఎం రేవంత్ హైదరాబాద్‌లో ఫుట్‌బాల్ ఆడిన నేపథ్యంలో కొండల్ రెడ్డి ఈ వ్యాఖ్యలు చేశారు. 56 ఏళ్ల వయసులోనూ తన సోదరుడు చూపించిన ఉత్సాహం, ఫిట్‌నెస్ అందరికీ స్ఫూర్తిదాయకమని ఆయన కొనియాడారు.

హైదరాబాద్‌లో జరిగిన ఓ కార్యక్రమంలో 38 ఏళ్ల మెస్సీతో కలిసి సీఎం రేవంత్ రెడ్డి ఫుట్‌బాల్ ఆడారు. ఈ సందర్భంగా బంతిని డ్రిబ్లింగ్ చేస్తూ, గోల్స్ చేస్తూ మెస్సీతో సమానంగా అడుగులు కదిపారని కొండల్ రెడ్డి తన సోషల్ మీడియా పోస్టులో పేర్కొన్నారు. 

"ఇది నిజమైన స్ఫూర్తి. ఇలాంటి నాయకులు తమ ఆరోగ్యంపై శ్రద్ధ పెట్టడం ద్వారా దేశ ప్రజలకు ఆదర్శంగా నిలుస్తారు. నాయకులు ఫిట్‌నెస్‌కు ప్రాధాన్యం ఇస్తే, పౌరులు కూడా చురుగ్గా ఉండేందుకు, జీవనశైలి వ్యాధులతో పోరాడేందుకు ప్రేరణ పొందుతారు. తద్వారా ఆరోగ్యకరమైన భారత్‌ను నిర్మించవచ్చు" అని ఆయన అభిప్రాయపడ్డారు. ఇలాంటి ఉత్సాహభరితమైన నాయకత్వానికి మరింత శక్తి చేకూరాలని కొండల్ రెడ్డి ఆకాంక్షించారు.