యూత్ వన్డేల్లో టీమిండియా సరికొత్త చరిత్ర.. ప్రపంచ రికార్డు నమోదు

అండర్-19 ఆసియా కప్ 2025 టోర్నమెంట్‌లో భారత యువ జట్టు ప్రత్యర్థి జట్లకు గట్టి హెచ్చరిక పంపింది. యూఏఈతో జ‌రుగుతున్న ఆరంభ మ్యాచ్‌లో టీమిండియా కుర్రాళ్లు విధ్వంసకర బ్యాటింగ్‌తో చెలరేగి, యూత్ వన్డే ఇంటర్నేషనల్ (ODI) క్రికెట్ చరిత్రలోనే తమ అత్యధిక స్కోరును నమోదు చేశారు. నిర్ణీత 50 ఓవర్లలో 6 వికెట్ల నష్టానికి 433 పరుగుల భారీ స్కోరు సాధించి సరికొత్త రికార్డు సృష్టించారు.

ఈ మ్యాచ్‌లో 14 ఏళ్ల ఓపెనర్ వైభవ్ సూర్యవంశీ ఆకాశమే హద్దుగా చెలరేగాడు. కేవలం 95 బంతుల్లోనే 171 పరుగులు చేసి భారత భారీ స్కోరుకు బలమైన పునాది వేశాడు. అతనికి మిడిల్ ఆర్డర్ బ్యాటర్లు ఆరోన్ జార్జ్ (69), విహాన్ మల్హోత్రా (69) చక్కటి సహకారం అందించడంతో పరుగుల వరద పారింది.

అరుదైన ప్రపంచ రికార్డు
ఈ స్కోరుతో భారత యువ జట్టు ఓ అరుదైన ప్రపంచ రికార్డును తన ఖాతాలో వేసుకుంది. యూత్ వన్డేల చరిత్రలో మూడుసార్లు 400కు పైగా స్కోర్లు చేసిన ఏకైక జట్టుగా భారత్ నిలిచింది. ఇంతకుముందు 2004లో స్కాట్లాండ్‌పై 425/3, 2022లో ఉగాండాపై 405/5 పరుగులు చేసింది. యూత్ వన్డేల్లో అత్యధిక స్కోరు రికార్డు మాత్రం ఆస్ట్రేలియా (480/6, కెన్యాపై 2002లో) పేరిట ఉంది.