మరో 3 గంటల్లో చనిపోతావన్నారు.. ఇప్పుడు వీడియో గేమ్స్‌తో వందల కోట్లు సంపాదిస్తున్నాడు!

కొన్నిసార్లు ఊహించని సంక్షోభాలే జీవితంలో కొత్త మార్గాలను చూపిస్తాయి. సరిగ్గా ఇలాంటి ఓ అనుభవమే జెంగ్‌హువా యాంగ్‌ను చావు అంచుల నుంచి విజయతీరాలకు చేర్చింది. 18 ఏళ్ల వయసులో, కాలేజీలో చేరిన మొదటి సెమిస్టర్‌లోనే ఆయన జీవితం తలకిందులైంది. 2008లో యూనివర్సిటీ ఆఫ్ ఇల్లినాయిస్‌లో చదువుతున్నప్పుడు, ఓ అరుదైన ఆటో ఇమ్యూన్ వ్యాధి బారిన పడ్డారు. శరీరంలో ప్లేట్‌లెట్లు ప్రమాదకరంగా పడిపోవడంతో, వైద్యులు కేవలం మూడు గంటల్లో చనిపోతావని తేల్చిచెప్పారు.

ఆ గండం నుంచి బయటపడినప్పటికీ, దాదాపు రెండేళ్లపాటు ఆసుపత్రుల చుట్టూ తిరగాల్సి వచ్చింది. ఆ క్లిష్ట సమయంలో 'లీగ్ ఆఫ్ లెజెండ్స్', 'మైన్‌క్రాఫ్ట్' వంటి వీడియో గేమ్స్ అతనికి మానసిక ధైర్యాన్ని, ఊరటను ఇచ్చాయి. అప్పుడే ఆయనకో ఆలోచన వచ్చింది. "కేవలం వినోదం కోసమే తయారుచేసిన ఈ గేమ్స్ నా ప్రాణాలను కాపాడాయి. అలాంటప్పుడు, ఇతరులకు సహాయం చేయాలనే ఉద్దేశంతో గేమ్స్ తయారు చేస్తే ఎంత శక్తిమంతంగా ఉంటుంది?" అని యాంగ్ ఓ ఇంటర్వ్యూలో గుర్తుచేసుకున్నారు.

ఆ ఆలోచనతోనే కేవలం 1,000 డాలర్ల (సుమారు రూ.83,000) పెట్టుబడితో 'సెరనిటీ ఫోర్జ్' అనే గేమింగ్ స్టూడియోను ప్రారంభించారు. దశాబ్దం తర్వాత, ఈ సంస్థ 'డోకి డోకి లిటరేచర్ క్లబ్' వంటి విజయవంతమైన గేమ్స్‌ సహా 70కి పైగా టైటిల్స్‌ను విడుదల చేసింది. ప్రస్తుతం ఈ కంపెనీ వార్షిక ఆదాయం 10 నుంచి 15 మిలియన్ డాలర్ల (సుమారు రూ.83 కోట్ల నుంచి రూ.125 కోట్లు) మధ్య ఉంది.

అయితే, డబ్బు సంపాదించడం కంటే తన గేమ్స్ ప్రజలపై చూపే ప్రభావమే తనకు ముఖ్యమని యాంగ్ చెబుతారు. "మా కంపెనీ ఆశయాలకు సరిపోదని భావించి, సుమారు 20 మిలియన్ డాలర్లు (రూ.166 కోట్లు) ఆర్జించి పెట్టే ప్రాజెక్టును కూడా తిరస్కరించాం. నా దగ్గరకు వచ్చిన ఎందరో యువకులు, 'మీ గేమ్ వల్లే నేను ఓ హింసాత్మక సంబంధం నుంచి బయటపడ్డాను, ఇప్పుడు చాలా సంతోషంగా ఉన్నాను' అని కన్నీళ్లతో చెబుతుంటారు. డబ్బు, ఉద్యోగుల సంఖ్య కంటే ఇలాంటి మాటలే నాకు ఎక్కువ స్ఫూర్తినిస్తాయి" అని ఆయన వివరించారు. వ్యాపార రంగంలోకి వచ్చేవారు వైఫల్యాలను తరచుగా, వేగంగా ఎదుర్కోవాలని, వాటి నుంచే పాఠాలు నేర్చుకోవాలని యాంగ్ సూచిస్తున్నారు.