కేటీఎం నుంచి కొత్త లిమిటెడ్ ఎడిషన్ బైక్.. 1390 సూపర్ డ్యూక్ ఆర్ఆర్ వచ్చేస్తోంది!

ప్రముఖ టూవీలర్ల తయారీ సంస్థ కేటీఎం.. బైక్ ప్రియుల కోసం మరో శక్తిమంతమైన మోడల్‌ను తీసుకురాబోతోంది. ఇప్పటికే మార్కెట్లో ఉన్న 1390 సూపర్ డ్యూక్ ఆర్ మోడల్‌కు కొనసాగింపుగా.. లిమిటెడ్ ఎడిషన్ 1390 సూపర్ డ్యూక్ ఆర్ఆర్ బైక్‌ను పరిచయం చేయడానికి సిద్ధమవుతోంది. మెరుగైన సస్పెన్షన్, తక్కువ బరువుతో ఈ కొత్త బైక్‌ను రూపొందిస్తున్నారు. గతంలో 1290 సూపర్ డ్యూక్ ఆర్ఆర్ మోడల్‌ను కూడా కేవలం 500 యూనిట్ల చొప్పున రెండుసార్లు పరిమిత సంఖ్యలో విడుదల చేసిన సంగతి తెలిసిందే.

యూరోపియన్ అప్రూవల్ డాక్యుమెంట్ల ద్వారా ఈ కొత్త బైక్ వివరాలు బయటకు వచ్చాయి. సైకిల్ వరల్డ్ కథనం ప్రకారం.. స్టాండర్డ్ మోడల్‌తో పోలిస్తే ఆర్ఆర్ వేరియంట్ బరువు తక్కువగా ఉంటుంది. స్టాండర్డ్ మోడల్ బరువు 467 పౌండ్లు కాగా, ఆర్ఆర్ వేరియంట్ బరువు 450 పౌండ్లు మాత్రమే. అయితే ఇంజిన్ పవర్, టార్క్‌లో మాత్రం ఎటువంటి మార్పులు లేవు. ఇందులో 1350సీసీ వీ-ట్విన్ ఇంజిన్‌ను అమర్చారు. ఇది 10,000 ఆర్‌పీఎం వద్ద 188 హెచ్‌పీ శక్తిని, 8,000 ఆర్‌పీఎం వద్ద 107 lb-ft టార్క్‌ను ఉత్పత్తి చేస్తుంది.

ఈ లిమిటెడ్ ఎడిషన్ బైక్‌లో అదనంగా అక్రపోవిక్ టైటానియం మఫ్లర్, 17 మిల్లీమీటర్లు వెడల్పైన హ్యాండిల్‌బార్ వంటి మార్పులు చేశారు. మెరుగైన రైడింగ్ అనుభూతి కోసం అత్యుత్తమ డబ్ల్యూపీ అపెక్స్ ప్రో సస్పెన్షన్‌ను కూడా అమర్చే అవకాశం ఉంది. నిజానికి ఈ బైక్‌ను ఈఐసీఎంఏ 2025లో ఆవిష్కరించాలని భావించినా, కొన్ని ఆర్థిక కారణాల వల్ల వాయిదా పడినట్లు తెలుస్తోంది. బజాజ్ పెట్టుబడులతో కేటీఎం తన ప్రణాళికలను మార్చుకునే అవకాశం ఉంది. ఈ బైక్ ధర స్టాండర్డ్ మోడల్ కంటే ఎక్కువగా ఉంటుందని అంచనా. విడుదల తేదీపై కంపెనీ ఇంకా అధికారిక ప్రకటన చేయలేదు.