‘అమరకావ్యం’గా తెలుగులోకి ధనుశ్‌ సినిమా.. ఆకట్టుకుంటున్న ట్రైలర్

కోలీవుడ్ స్టార్ హీరో ధనుశ్‌, బాలీవుడ్ నటి కృతి సనన్ ప్రధాన పాత్రల్లో నటించిన ‘తేరే ఇష్క్ మై’ చిత్రం బాక్సాఫీస్ వద్ద మంచి విజయాన్ని అందుకుంది. దర్శకుడు ఆనంద్ ఎల్. రాయ్ తెరకెక్కించిన ఈ సినిమాకు ప్రేక్షకుల నుంచి అద్భుతమైన స్పందన లభిస్తోంది. ముఖ్యంగా ధనుశ్‌, కృతి సనన్ నటన, పాత్రల మధ్య ఉన్న భావోద్వేగాలు ప్రేక్షకులను ఆకట్టుకుంటున్నాయి. దీనికి ఏ.ఆర్. రెహమాన్ అందించిన సంగీతం కూడా తోడవడంతో సినిమా విజయవంతంగా ప్రదర్శితమవుతోంది.

ఇప్పటికే థియేటర్లలో ఉన్న ఈ సినిమాపై అంచనాలను మరింత పెంచుతూ, తాజాగా విడుదలైన తెలుగు ట్రైలర్ సోషల్ మీడియాలో హల్‍చల్ చేస్తోంది. ప్రేమ, విరహం, బాధ వంటి భావాలను ట్రైలర్‌లో ఎంతో లోతుగా చూపించారు. కథలోని ఎమోషనల్ డెప్త్‌ను తెలియజేస్తూ, సినిమాపై తెలుగు ప్రేక్షకుల్లో ఆసక్తిని రేకెత్తిస్తోంది. ప్రేమకథలను తనదైన శైలిలో తెరకెక్కించడంలో దర్శకుడు ఆనంద్ ఎల్. రాయ్ మరోసారి తన ప్రత్యేకతను చాటుకున్నారని ప్రశంసలు వస్తున్నాయి.

గుల్షన్ కుమార్, టి-సిరీస్, కలర్ ఎల్లో సంయుక్తంగా సమర్పించిన ఈ చిత్రాన్ని ఆనంద్ ఎల్. రాయ్, హిమాన్షు శర్మ, భూషణ్ కుమార్ నిర్మించారు. హిమాన్షు శర్మ, నీరజ్ యాదవ్ కథ అందించారు. నవంబర్ 28న హిందీ, తమిళంతో పాటు తెలుగులోనూ ఈ చిత్రం ప్రపంచవ్యాప్తంగా విడుదలైంది.