నేడు ఏపీకి వెళ్లనున్న కోమటిరెడ్డి.. పవన్ కల్యాణ్‌ను కలుస్తారా? అనే దానిపై ఉత్కంఠ!

తెలంగాణ రోడ్లు, భవనాల శాఖ మంత్రి కోమటిరెడ్డి వెంకట రెడ్డి ఈరోజు ఆంధ్రప్రదేశ్‌లో పర్యటించనున్నారు. తెలంగాణ ప్రభుత్వం ప్రతిష్ఠాత్మకంగా నిర్వహించ తలపెట్టిన ‘తెలంగాణ రైజింగ్ సమ్మిట్‌’కు ఏపీ ముఖ్యమంత్రి చంద్రబాబు నాయుడిని ఆహ్వానించేందుకు ఆయన వెళ్తున్నారు. ఇటీవల ఏపీ డిప్యూటీ సీఎం పవన్ కల్యాణ్‌పై కోమటిరెడ్డి చేసిన వ్యాఖ్యల నేపథ్యంలో ఈ పర్యటన రాజకీయంగా ఆసక్తిని రేకెత్తిస్తోంది.

కొన్ని రోజుల క్రితం పవన్ కల్యాణ్ కోనసీమకు తెలంగాణ నాయకుల దిష్టి తగిలిందేమోనని వ్యాఖ్యానించారు. దీనిపై తెలంగాణ కాంగ్రెస్ నేతలు తీవ్రంగా స్పందించారు. ముఖ్యంగా మంత్రి కోమటిరెడ్డి స్పందిస్తూ, పవన్ సినిమాలను తెలంగాణలో విడుదల కానివ్వబోమని హెచ్చరించారు. ఈ ఘాటు వ్యాఖ్యల తర్వాత కోమటిరెడ్డి ఇప్పుడు ఏపీకి వస్తుండటంతో, ఆయన పవన్ కల్యాణ్‌ను కలుస్తారా? లేదా? అనే దానిపై ఉత్కంఠ నెలకొంది.

ఇదిలా ఉండగా, తెలంగాణ సీఎం రేవంత్ రెడ్డి ఈ సమ్మిట్‌ను విజయవంతం చేసేందుకు విస్తృతంగా పర్యటిస్తున్నారు. ఇప్పటికే ఢిల్లీ వెళ్లి ప్రధాని నరేంద్ర మోదీ, కేంద్ర మంత్రులు, కాంగ్రెస్ పెద్దలను ఆహ్వానించారు. ఈ సదస్సుకు ప్రముఖ ఫుట్‌బాల్ క్రీడాకారుడు లియోనెల్ మెస్సీతో పాటు పలువురు అంతర్జాతీయ ప్రముఖులు హాజరుకానున్నారని ప్రభుత్వం ప్రకటించింది.