శబరిమలకు పోటెత్తుతున్న భక్తులు... మరో 10 స్పెషల్ రైళ్లు ఏర్పాటు చేసిన దక్షిణ మధ్య రైల్వే

శబరిమల వెళ్ళే అయ్యప్ప భక్తులకు దక్షిణ మధ్య రైల్వే శుభవార్తను అందించింది. భక్తుల రద్దీని దృష్టిలో ఉంచుకుని, తాజాగా మరో 10 ప్రత్యేక రైళ్లను నడపనున్నట్లు ప్రకటించింది. ఇదివరకే 60 ప్రత్యేక రైలు సర్వీసులను నడుపుతుండగా, వాటికి అదనంగా ఈ కొత్త సర్వీసులను ఏర్పాటు చేస్తున్నామని అధికారులు తెలిపారు.

ఈ ప్రత్యేక రైళ్లు డిసెంబర్ 19 నుంచి 31వ తేదీ మధ్య వివిధ తేదీల్లో తెలుగు రాష్ట్రాల్లోని పలు ప్రాంతాల మీదుగా రాకపోకలు సాగిస్తాయి. ప్రయాణికుల సౌకర్యార్థం ఈ నిర్ణయం తీసుకున్నట్లు రైల్వే శాఖ వెల్లడించింది.

ఈ ప్రత్యేక రైళ్లలో కొన్నింటికి సంబంధించిన టికెట్ల బుకింగ్ డిసెంబర్ 3 (బుధవారం) ఉదయం 8 గంటల నుంచి ప్రారంభమవుతుందని రైల్వే అధికారులు 'ఎక్స్' వేదికగా వెల్లడించారు. సిర్పూర్ కాగజ్‌నగర్ - కొల్లం (07117), చర్లపల్లి - కొల్లం (07119, 07121), నాందేడ్ - కొల్లం (07123) రైళ్లకు ప్రయాణికులు టికెట్లు బుక్ చేసుకోవచ్చు. ఈ అదనపు సర్వీసుల వల్ల అయ్యప్ప భక్తుల ప్రయాణ భారం కొంతమేర తగ్గుతుందని భావిస్తున్నారు.